ԱՄՆ նախագահ Դոնալդ Թրամփը Ուկրաինայում ԱՄՆ նախկին դեսպան Մարի Յովանովիչին, որը ցուցմունքներ է տալիս իմփիչմենթի շրջանակում, մեղադրել է այն բանում, որ նա հրաժարվել է իր լուսանկարը դնել դեսպանատանը, հայտնում է BBC-ն:
Fox News-ի առավոտյան շոուի ժամանակ ԱՄՆ նախագահն ասել է, որ Կիեւում Յովանովիչը «չէր ցանկանում իր լուսանկարը դնել դեսպանատանը»:
Ուրբաթ հեռուստաալիքի «Fox եւ ընկերներ» առավոտյան շոուի ժամանակ հեռախոսազրույցում Դոնալդ Թրամփն արդարացրել է Մարի Յովանովիչին դեսպանի պաշտոնից հեռացնելը:
«Այդ դեսպանը, որին բոլորն այդքան հոյակապ են համարում, դեսպանատանն իմ լուսանկարը չէր դրել»,- նշել է ԱՄՆ նախագահը:
«Նա իմ մասին վատ բաներ էր խոսում, նա ինձ չէր պաշտպանում, իսկ ես դեսպանին փոխելու իրավունք ունեմ... Ըստ ստանդարտների՝ Միացյալ Նահանգների նախագահի պատկերը պետք է լինի դեսպանատներում: Այդ կինը հրեշտակ չէր, այդպես չէ՞»,- ամփոփել է Դոնալդ Թրամփը:
