Եվրախորհրդարանը հաստատել է Եվրահանձնաժողովի նոր կազմը՝ Գերմանիայի պաշտպանության նախկին նախարար Ուրսուլա ֆոն դեր Լյաենի նախագահությամբ, գրում է DW-ն։
Չորեքշաբթի՝ նոյեմբերի 27-ի լիագումար նիստում 461 եվրապատգամավոր հավանություն տվեց նոր եվրահանձնակատարների ցուցակին։ Դեմ քվեարկեց 157 մարդ, եւս 89-ը ձեռնպահ մնաց։
Այսպիսով, Եվրահանձնաժողովի նորացված կազմը կկարողանա դեկտեմբերի 1-ին՝ նախատեսվածից 1 ամիս ուշ, սկսել աշխատանքը։ 61-ամյա Ուրսուլա ֆոն դեր Լյաենը առաջին կինն է Եվրամիության գործադիր իշխանության բարձրագույն մարմնի ղեկավարի պաշտոնում։
Ելույթ ունենալով եվրախորհրդարանականների առջեւ՝ նա շնորհակալություն հայտնեց իր նախորդին՝ Ժան-Կլոդ Յունկերին՝ նրան անվանելով «մեծ եվրոպացի»։ Նա առաջիկա տարիների կարեւորագույն խնդիրներ նշեց կլիմայի պաշտպանությունն ու անալոգայինից թվային ձեւաչափի անցումը տարբեր ոլորտներում։ «Իմ ուղերձը պարզ է. եկեք սկսենք աշխատել»,- ավելացրել է նա։
Միեւնույն ժամանակ, թափուր է մնում Մեծ Բրիտանիայի եվրահանձնակատարի պաշտոնը։ Լոնդոնը պարտավոր է որեւէ մեկին առաջադրել եվրահանձնակատարի պաշտոնում, քանի որ բրեքզիթի հերթական հետաձգումից հետո մինչեւ 2020 թվականի հունվարի վերջ երկիրը նախկինի պես մտնում է ԵՄ կազմի մեջ։ Բայց բրիտանական կառավարությունը հայտարարել է, որ դեկտեմբերի 12-ի խորհրդարանական ընտրությունների հետ կապված՝ դա չի անելու։