Հավաքական անվտանգության պայմանագրի կազմակերպության (ՀԱՊԿ) երկրների Արտաքին գործերի նախարարությունների, Պաշտպանության նախարարությունների եւ Անվտանգության խորհուրդների ղեկավարները Բիշքեկում կայացած նիստում քննարկել են այն փաստաթղթերի նախագծերը, որոնց ստորագրումը ծրագրվում է առաջիկա հինգշաբթի ՀԱՊԿ անդամ-երկրների ղեկավարների հանդիպման ժամանակ, հայտնում է ՌԻԱ Նովոստին՝ հղում կատարելով Ռուսաստանի Անվտանգության խորհրդի աշխատակազմի մամուլի ծառայությանը։
«Մասնավորապես, փաստաթղթերի նախագծերը վերաբերում են միջազգային փոխազդեցության եւ համագործակցության կատարելագործմանը՝ գլոբալ եւ տարածաշրջանային անվտանգության ամրապնդման նպատակներով, Հայրենական մեծ պատերազմի հաղթանակի 75 ամյակի տոնակատարության միջոցառումների ծրագրին, ՀԱՊԿ նորմատիվ իրավական ակտերում փոփոխություններ կատարելուն, պաշտպանական-արդյունաբերական համալիրների ձեռնարկությունների եւ կազմակերպությունների ինտեգրացիոն կապերի զարգացմանը, համատեղ գիտահետազոտական եւ փորձարարական-կոնստրուկտորական աշխատանքների կազմակերպմանն ու անցկացմանը»,- ասվում է հաղորդագրության մեջ։
Նիստի մասնակիցները նաեւ քննարկել են ՀԱՊԿ տարածաշրջաններում ռազմաքաղաքական իրավիճակը, ուսումնասիրել են տեղեկատվական տեխնոլոգիաների ոլորտում հանցագործություններին դիմակայելու հետ կապված թեմաներ, ինչպես նաեւ ՀԱՊԿ-ում Ռուսաստանի առաջիկա նախագահության ընթացքում իրենց աշխատանքի առաջնահերթ ուղղությունները։
Նիստին մասնակցել է ՌԴ ԱԽ քարտուղար Նիկոլայ Պատրուշեւը։ Ընդունվել է որոշում 2020թ․ ապրիլին Մոսկվայում ՀԱՊԿ երկրների ԱԽ քարտուղարների հանձնաժողովի հերթական նիստ անցկացնելու մասին։
