Այն միտումը, որ փորձ են անում Սերժ Սարգսյանին մեղադրանք առաջադրելը որակել որպես քաղաքական հետապնդում, իհարկե, չի կարող ընդունելի լինել եւ չի կարող տեր գտնել Հայաստանում: Այս մասին, այսօր՝ դեկտեմբերի 6-ին, ԱԺ-ում լրագրողների հետ զրույցում նշեց «Իմ քայլը» խմբակցության ղեկավար Լիլիթ Մակունցը՝ անդրադառնալով ՀՀԿ հայտարարությանը:
«Ես ուղղակի ուզում եմ հիշեցնել, որ նույն օրը տեղի է ունեցել կոռուպցիայի դեմ պայքարի հետ կապված երկու հրապարակում: Մեկն առնչվել է Սերժ Սարգսյանին, մյուսը՝ ԿԳՄՍ փոխնախարար Գեւորգ Լոռեցյանին: Հետեւաբար, եթե կոռուպցիայի դեմ մղվում է պայքար, ապա չկա որեւէ զիջում այդ առումով, կապ չունի մեր թիմակիցն է, թե ընդդիմադիր որեւէ կուսակցության ներկայացուցիչ: Այո, մենք վերահաստատում ենք, որ չի լինելու կոռուպցիայի դեմ որեւէ զիջում: Սա այդ կոնտեքստում են դիտարկում»,-ասաց Մակունցը:
Ինչ վերաբերում է ՀՀԿ հայտարարությանը, թե Սերժ Սարգսյանին մեղադրանք առաջադրելով ցանկանում են լռեցնել նրան, Մակունցն ասաց. «Նախ, ուզում եմ նշել, ոչ ոչ Սերժ Սարգսյանի, ոչ Լոռեցյանի դեպքում չեմ ուզում խախտել անմեղության կանխավարկածը, բայց միաժամանակ պետք է հակադարձեմ, որ որեւէ քաղաքական հետապնդում չկա, կա կոնկրետ դեպքի առնչությամբ հարուցված գործ: Թե ինչպես կընթանա հետաքննությունը, ցույց կտա ընթացքը: Կհետեւենք եւ կանենք համապատասխան եզրակացություններ»:
Նա բնական համարեց, որ ՀՀԿ-ն փորձում է դա որակել որպես քաղաքական հետապնդում, որը իրենց համար անընդունելի է: