Չինաստանի արտաքին գործերի նախարար Վան Ին կոչ է արել Եվրամիությանը երկրի հետ սկսել աշխատանքն ազատ առեւտրի համաձայնագրի շուրջ, տեղեկացնում է ՌԻԱ «Նովոստի»-ն։
Չինաստանը եւ Եվրամիությունը 2013-ին բանակցություններ են սկսել ներդրումային համաձայնագրի վերաբերյալ, Վան Ին առաջարկեց կողմերին մտածել նաեւ ազատ առեւտրի պայմանագրի մասին։
«Մենք պետք է աշխատենք FTA-ի շուրջ։ Շատ երկրների հետ մենք բանակցություններ ենք վարում FTA-ի մասին։ Եվրոպան մեզ համար առաջնահերթություններից մեկն է»,- ասել է նա Բրյուսելի համաժողովում։
Նախարարը նշել է, որ կողմերը «կարող էին առնվազն բանակցություններ վարել FTA-ի մասին՝ սկսելով տնտեսական հիմնավորումից», փորձագետները կարող էին գնահատել՝ շահավետ կլինի՞ արդյոք նման համաձայնագիրը։ Նրա խոսքով՝ տնտեսական հիմնավորման գործընթացը կարող է տեւել առնվազն մեկ-երկու տարի, բանակցությունները՝ եւս մի քանի տարի։
«Մենք պետք է օգտագործենք հնարավորությունն ու սկսենք աշխատել»,- ասել է նա։
Նախարարը նշել է, որ ԵՄ-ը բանակցություններ է վարում եւ համաձայնագրեր կնքում ազատ առեւտրի մասին շատ երկրների հետ։ «Բայց դուք չեք խոսում Չինաստանի հետ։ Բայց Չինաստանը հիմնական առեւտրային գործընկերն է, ինչո՞ւ չեք խոսում ձեր խոշոր առեւտրային գործընկերոջ հետ։ Ես դա հասկանալ չեմ կարողանում։ Օգտագործելով այս հնարավորությունը՝ ցանկանում եմ կոչ անել... եկեք սկսենք բանակցությունները FTA-ի մասին, գոնե տնտեսական հիմնավորումը»,- ասել է նախարարը։
