Քաղաքապետն ունի ավագանու 57 անդամ, որոնք կարող են ընդմիշտ գովաբանել քաղաքապետի աշխատանքը. եւ կա ընդդիմություն, եւ պետք է հաշվի նստել նրա կարծիքի հետ: Այս մասին, այսօր՝ դեկտեմբերի 17-ին, լրագրողների հետ հանդիպման ժամանակ նշեց Երեւանի ավագանու «Լույս» խմբակցության անդամ Թեհմինա Վարդանյանը:
«Եթե ընդդիմությունը որեւէ խնդիր է բարձրաձայնում, պետք չի հեգնել, ծաղրել ու ծիծաղել»,-ասաց նա:
Հարցին, թե արդյոք Երեւանի ավագանու նիստում իր ելույթը անձնական դաշտ մտնել չէր, Թեհմինա Վարդանյանը պատասխանեց. «Իսկ դուք քաղաքապետի ծիծաղը սուր չե՞ք համարում, նորմա՞լ եք համարում, որ ավագանու անդամի ելույթի ժամանակ նրան ընդհատում է քաղաքապետի խորհրդականը, որն այդ իրավունքը չունի: Այո, երբեմն իմ քննադատությունները սուր են, բայց դա բնական է: Մենք չենք համարում, որ սխալ գծի վրա ենք, ընդդիմության քննադատությունները պետք է սուր լինեն»:
Հարցին, թե արդյոք «Լույս» խմբակցությունը չի կորցնի, եթե Դավիթ Խաժակյանը մանդատը վայր դնի, նա պատասխանեց. «Այո, կորելու է մեր շատ թանկագին գործընկերը եւ նրա հեռանալը մեզ համար կարող է ցավալի լինել»:
Իսկ ահա «Լույս» խմբակցության անդամ Անի Խաչատրյանն ասաց. «Իհարկե, մեր դիրքերը չեն թուլանա, մենք շարունակելու ենք մեր գործունեությունը, ինչպես եղել է: Մեր քաղաքական օրակարգում ոչինչ չի փոխվել»:
Ավելի վաղ NEWS.am-ը հայտնել էր, որ այսօր առավոտյան Մարուքյանն իր ֆեյսբուքյան էջում գրել էր. «Լուսավոր Հայաստան» կուսակցությունն այժմ քննարկում է Երևանի ավագանիում իր միակ անդամին` Դավիթ Խաժակյանին հետ կանչելու և ավագանիում նրա գործունեության շարունակության նպատակահարմարության հարցը»։
Նշենք, որ Երեւանի ավագանու «Լույս» խմբակցությունն ունի երեք անդամ, որից միայն Դավիթ Խաժակյանն է ԼՀԿ-ից, մյուս երկու անդամները (Անի Խաչատրյան, Թեհմինա Վարդանյան) «Հանրապետություն» կուսակցությունից են:
