Ռուսաստանում հայկական վարորդական իրավունքի վկայականների ճանաչման հարցի լուծումը ձեռնտու կլինի 2 կողմին էլ: Այս մասին դեկտեմբերի 18-ին ԱԺ-ում Արտաքին հարաբերությունների խորհրդարանական մշտական հանձնաժողովի եւ Դաշնային խորհրդի միջազգային գործերով կոմիտեի համատեղ նիստի ավարտից հետո կայացած մամուլի ասուլիսում ասաց ռուսական պատվիրակության ղեկավար, Կոմիտեի ղեկավար Կոնստանտին Կոսաչեւը:
Նրա խոսքով՝ այս հարցը պետք է լուծվի, քանի որ առնչվում է Ռուսաստանում աշխատող բավական մեծ թվով մարդկանց շահերին: «Մյուս կողմից՝ անհրաժեշտ է հասկանալ, որ սա ուղեկցվում է նաեւ որոշակի պահանջներով՝ կապված ուղեւորափոխադրումների անվտանգության հետ»,- պարզաբանեց Կոսաչեւը՝ հավելելով, որ այս դեպքում կարեւոր է նաեւ համապատասխան մակարդակով ռուսերենի իմացությունը, ինչպես նաեւ ճանապարհային երթեւեկության կանոնները եւ Ռուսաստանում ավտոտրանսպորտ վարելու յուրահատկությունը հասկանալը, քանի որ ամեն երկրում դրանք տարբեր են:
Նա դրա հետ մեկտեղ հավաստիացրեց, որ այս հարցը մոռացության մատնված չէ: «Մենք դրա նշանակությունը հասկանում ենք, եւ ես համոզված եմ, որ վերջնարդյունքում լուծում կգտնվի: Այն պետք է ձեռնտու լինի թե՛ մի, թե՛ մյուս կողմին»,- շեշտեց ռուս սենատորը: