Ես կարծում եմ՝ մենք մտահոգվելու բան չունենք։ Այս մասին NEWS.am-ի հետ զրույցում ասաց ՀՀ ԿԵ սննդամթերքի անվտանգության տեսչական մարմնի ղեկավար Գեորգի Ավետիսյանը՝ անդրադառնալով Ռուսաստանի «Ռոսսելխոզնադզոր»-ի հայտարարությանը, որ Էկվադորից ներկրված բանանի երկու խմբաքանակում բազմակեր սապատավոր ճանճեր են հայտնաբերվել։

«Բուսասանիտարական հսկման յուրաքանչյուր մթերք, որ մտնում է Հայաստան, պարտադիր անցնում է բուսասանիտարական լաբորատոր հետազոտություն։ Այն բույսերն ու ապրանքները, որոնք ենթակա են ենթահսկման սահմանին, և եթե հայտնաբերվում են վնասատուներ, պարզապես չեն հատում սահմանը՝ կլինի օդային թե ցամաքային։ Եթե հայտնաբերենք, պարտադիր կսահմանափակենք տվյալ խմբաքանակը՝ հետ ուղարկելով կամ ոչնչացնելով։ Ես կարծում եմ՝ մենք մտահոգվելու բան չունենք։ Սապատավոր ճանճն էլ մեզ այդքան չի անգանգստացնում»,-նշեց նա։

Գեորգի Ավետիսյանը նաև ասաց, որ չի հիշում դեպք, որ ներկրված բանաններում սապատավոր ճանճ հայտնաբերված լինի․ «Ես անձամբ նման դեպք չեմ հիշում, գուցե հարցնեմ լաբորատորիայում, ասեն, բայց ես չեմ հիշում»։

Նա վստահեցրեց՝ սահմանին պատշաճ լաբորատոր հետազոտություն իրականացվում է․ «Ի տարբերություն այլ ենթահսկման, ֆիտոսանիտարական լաբորատորիա ունենք հենց տեղում՝ սահմանին, նույնիսկ եթե կիլոգրամով են բուսական ծագման մթերք բերում, ես հրահանգել եմ, որ պարտադիր հսկեն սահմանին, տեսնեն վնասատու կա, թե չէ, նոր թույլ տան անցկացնել»։

Օրերս «Ռոսսելխոզնադզոր»-ը հայտարարություն էր տարածել, որտեղ նշել էր, որ Էկվադորից ներկրված բանանները չեն համապատասխանում անվտանգության նորմերին։ Մասնավորապես, այս տարվա դեկտեմբերի 11-ին Էկվադորից Սանկտ Պետերբուրգ ներկրված բանանի երկու խմբաքանակում բազմակեր սապատավոր ճանճեր են հայտնաբերվել:

Հաշվի առնելով, որ սա առաջին դեպքը չէ, և որ դրանք պարունակում են առողջության համար վտանգավոր սապատավոր ճանճեր՝ «Ռոսսելխոզնադզոր»-ը հայտնել է, որ եթե նմանատիպ խախտումները պարբերական բնույթ կրեն, ապա մարմինն իրեն իրավունք է կվերապահի ժամանակավոր սահմանափակումներ դնել Էկվադորից ներկրվող բանանի վրա։