Այսպես կոչված հեղափոխական փոփոխություններից հետո Հայաստանի բնակչության սպասումները չեն արդարացել: Այդ մասին դեկտեմբերի 20-ին լրագրողների հետ հանդիպման ժամանակ հայտարարել է «Հանուն սոցիալական արդարության» կուսակցության նախագահ Արման Ղուկասյանը:
Նա նշել է, որ խորհրդարանական ընտրություններից հետո անմիջապես բացահայտվեց «Իմ քայլը» դաշինքի ներսում պատգամավորների պառակտումը, և այդպիսի քաղաքական խմբից բնավ միշտ չէ, որ կարելի է ակնկալել թափանցիկություն և գործողությունների կանխատեսելիություն, և, հետևաբար, նաև արդյունավետություն:
«Որպես չհամակարգված գործողությունների օրինակ կարող է ծառայել Կոռուպցիայի կանխարգելման հանձնաժողովի ստեղծումը, երբ «Իմ քայլի» քվոտայով ընտրված անդամներից մեկը դաշինքի ղեկավարության համար անսպասելիորեն վայր է դրել իր լիազորությունները»,-պարզաբանել է Արման Ղուկասյանը:
Կուսակցության ղեկավարը հայտարարել է, որ խորհրդարանական ընտրություններից անմիջապես հետո պարզ էր դարձել, որ Հայաստանում շարունակում է գործել որոշումների կայացման «սուպերվարչապետական» համակարգը, ինչն արտահայտվել է նրանում, որ ԱԺ իշխող դաշինքի անդամները, ըստ էության, զրկվել են ազատ գործելու հնարավորությունից:
««Իմ քայլը» դաշինքը փորձել է դրսևորել որոշակի ինքնուրույնություն Ամուլսարի հանքը շահագործելու հարցում, երբ դրա շարքերում հայտնվել են մի խումբ պատգամավորներ, որոնք բողոքել են Կառավարության ընտրած ուղու դեմ, սակայն ամեն ինչ դրանով էլ ավարտվել էր»,-ընդգծել է Ղուկասյանը:
«Հանուն սոցիալական արդարության» կուսակցության փոխնախագահ Ծովինար Կոստանյանն, իր հերթին, հիշեցրել է, որ կոռուպցիայի դեմ հայտարարված պատերազմի շրջանակում Ազգային Ժողովն ընդունել է Ապօրինինի ծագում ունեցող գույքի բռնագանձման մասին օրենքը, ինչպես նաև փոփոխություններ էր կատարելու բանկային գաղտնիքի մասին օրենքում:
«Այդ փոփոխությունները թույլ են տալիս իրավապահ մարմիններին ստանալ քրեական գործերի մեջ չներգրավված անձանց բանկային տեղեկատվությունը: Անցանկալի դատավորներից ազատվելու և ընդդիմության վրա ճնշում գործադրելու՝ իշխանությունների ցանկության պարագայում այդ ամենը հարցեր է առաջացնում»,-հավելել է նա:
