Թվում է, թե շատ քիչ ժամանակ է անցել այն պահից, երբ Apple ընկերությունը ներկայացրեց իր 11-րդ iPhone-ը, իսկ համացանցում արդեն հայտնվել են հանրահայտ սմարթֆոնի 12-րդ մոդելի որոշ մանրամասները։ Եթե հավատանք հայտնված տվյալներին, «խնձորային» գաջեթների արտադրողները բոլորովին չեն պատրաստվում կանգ առնել զարգացման հարցում, եւ հաջորդ տարի Apple-ի երկրպագուներին մի շարք հաճելի նորամուծություններ են սպասում, գրում է Planet Today-ը։

Ըստ ԶԼՄ-ներում հայտնված տեղեկատվության՝ Apple-ի նոր սմարթֆոնը հաջորդ տարի 5G կստանա։ Այս նորույթով դժվար թե ամերիկյան մասնագետները 2020թ․ կարողանան որեւէ մեկին զարմացնել։ Նույնիսկ այժմ շատ չինական ընկերություններ սմարթֆոնների վրա նշում են բջջային կապի հինգերորդ սերնդի առկայությունը։

Սակայն 5G-ն միակ առավելությունը չէ, որով նոր iPhone-ը կարող է զարմացնել սպառողին։ Վերլուծաբան Մինգ Չի Կուոն, ում կանխատեսումները բավական ստույգ են, նշում է, որ Apple-ի նոր սմարթֆոնը կարող է բացարձակ անլար լինել։ Սրանից ելնելով՝ iPhone-ը կզրկվի բոլոր բնիկներից եւ ամբողջությամբ կանցնի անլար միացման։ Սակայն թե ինչպես դրան կարձագանքեն օգտատերերը, առայժմ հայտնի չէ։

Ոչ պակաս կարեւոր կլինի նաեւ ապագա գաջեթների դիզայնի որոշ փոփոխությունները։ Ինչպես նշում են ԶԼՄ-ները, նոր iPhone-ը կթողարկվի արդեն հնաոճ համարվող 4կամ 5 մոդելների դիզայնով։ Այսինքն հեռախոսի անկյուններն ավելի քիչ կլորացված կլինեն։