Հայաստանի ազգային պոլիտեխնիկական համալսարանում բացվել է «Խելացի լուծումների» կենտրոնը։ Այս մասին տեղեկացնում են ԿԳՄՍ-ից։
Հայաստանի ազգային պոլիտեխնիկական համալսարանում Տեղեկատվական եւ հաղորդակցության տեխնոլոգիաների (ՏՀՏ) գործատուների միության նախաձեռնությամբ եւ «ՎիվաՍել-ՄՏՍ» ընկերության աջակցությամբ այսօր բացվել է «Խելացի լուծումների» կենտրոնը:
Բացման արարողությանը ներկա են եղել ՀՀ կրթության, գիտության, մշակույթի եւ սպորտի նախարար Արայիկ Հարությունյանը, ՀՀ բարձր տեխնոլոգիական արդյունաբերության նախարար Հակոբ Արշակյանը, «ՎիվաՍել-ՄՏՍ» ընկերության գլխավոր տնօրեն Ռալֆ Յիրիկյանը եւ հյուրեր:
«Այս ծրագիրը գործատուների եւ բուհերի համագործակցության լավագույն օրինակներից է: Նման փորձեր ունենք եւ հաջողությամբ իրականացնում ենք։ Կարծում եմ՝ կենտրոնի բացումը լրացուցիչ խթան կլինի բարձրագույն կրթության ոլորտ-բիզնես համագործակցության համար։ Այստեղ ստեղծվող հնարավորությունները լուծելու են նաեւ հետազոտական հատվածի զարգացման հարցը, ինչը կառավարության առաջնահերթություններից է։ Գործատուն եւ բուհերը աշխատաշուկան ավելի լավ են զգում։ Միասին կաշխատենք, որ ծրագիրը հաջող լինի եւ ավարտելուց հետո ունենանք պատրաստի մասնագետներ»,- ասել է ԿԳՄՍ նախարար Արայիկ Հարությունյանը` շնորհավորելով եւ բարի երթ մաղթելով կենտրոնին:
ՀՀ բարձր տեխնոլոգիական արդյունաբերության նախարար Հակոբ Արշակյանի խոսքով` համաշխարհային փորձը ցույց է տալիս, որ գործակցությունը մասնավոր հատվածի հետ նպաստում է, որ բուհական ծրագրերը լինեն արդիական, արդյունքում, բուհական կրթությունը մրցունակ կդառնա ու կզարգանա։ Նախարարի հավաստմամբ՝ մյուս տարի վերապատրաստման ծրագրերը կընդլայնվեն եւ կընդգրկեն ավելի մեծ թվով կադրերի։
ՏՀՏ գործատուների միության գործադիր տնօրեն Էդուարդ Մուսայելյանը տեղեկացրել է, որ «Խելացի լուծումների» կենտրոնը մեծ ծրագրի կրթական հատվածն է, որը ներկայացնում է 2 լսարան եւ 3 լաբորատորիա հետեւյալ ուղղություններով՝ կիբեռանվտանգություն, միկրոէլեկտրոնիկա եւ իրերի համացանց: Ըստ նրա` կենտրոնում իրականացվելու են ինչպես մագիստրոսական կրթական ծրագրեր, այնպես էլ վերապատրաստման դասընթացներ:
