Սիդնեյի առեւտրի կենտրոնում սուրբծննդյան գովազդային ակցիան ավարտվեց ծեծկռտուքով այցելուների միջեւ։ Կազմակերպիչները հարյուրավոր փուչիկներ արձակեցին, որոնց ներսում նվերներ էին։
Մոտ 150 մարդ նետվեց մարտի, որպեսզի ստանա բաղձալի նվերները։ Ամբոխը սլացավ առաջ՝ ոտնատակ տալով մարդկանց, գետին գցելով սուրբծննդյան դեկորացիան Սանտա Կլաուսի հետ միասին։
12 մարդ թեթեւ վնասվածքներ է ստացել, 5 հոգի հասցվել է հիվանդանոց՝ «ոտքերի ու կոճերի վնասվածքներով, կրծքավանդակի ցավով եւ մկանների վնասվածքներով»,- ասվում է Նոր Հարավային Ուելսի նահանգի շտապօգնության հաղորդագրությունում։
«Հենց որ փուչիկները օդ բարձրացան, ամբոխը նետվեց դեպի փուչիկները, ինչի հետեւանքով շատ մարդիկ գետին տապալվեցին եւ վիրավորումներ ստացան»,- ասվում է ոստիկանության հայտարարությունում։
Առեւտրի կենտրոնի ղեկավարությունը տեղական լրատվամիջոցներին տեղեկացրել է, որ կհետաքննի միջադեպը։