Պաշտպանության ոլորտում հայ-ռուսական փոխգործակցությունը Հայաստանի եւ Ռուսաստանի անվտանգության ամրապնդման, ինչպես նաեւ տարածաշրջանում խաղաղության եւ կայունության պահպանման առանցքային գործոնն է: Այս մասին դեկտեմբերի 24-ին տարեվերջյան ամփոփիչ մամուլի ասուլիսի ժամանակ ասաց Հայաստանի Հանրապետությունում Ռուսաստանի Դաշնության արտակարգ եւ լիազոր դեսպան Սերգեյ Կոպիրկինը:
Նրա խոսքով՝ Հայաստանի տարածքում շարունակում է գործել ռուսական 102-րդ ռազմաբազան, քայլեր են ձեռնարկվել այն նպատակով, որ բարձրանա մարտական պատրաստականության արդյունավետությունը: «Լուրջ արդյունքներ են ձեռք բերվել: Բազայի մարտական ներուժը կրկնակի մեծացնելու ծրագրեր կան՝ առանց մեծացնելու զինծառայողների թիվը»,- շեշտեց դեսպանը:
Կոպիրկինը նաեւ հիշեցրեց առաջիկա տարիներին Գյումրիում տեղակայված ռուսական 102-րդ բազայում ենթակառուցվածքների բարելավման քայլեր իրականացնելու ծրագրերի մասին: «Համապատասխան աշխատանքներն իրականացվելու են նաեւ հայ կապալառուների ներգրավմամբ»,- հայտնեց դիվանագետը:
Նա նշեց, որ այս տարի հաջողությամբ զարգացել է ռազմա-տեխնիկական համագործակցությունը: «Այն, ինչ արվել է, ցույց է տալիս Հայաստանի պաշտպանունակության ամրապնդման եւ մեծացման գործում այդ համագործակցության կարեւոր դերակատարումը»,- ամփոփեց ՌԴ դեսպանը: