Նոր տարվա կապակցությամբ յակուտացի քանդակագործ Միխայիլ Բոպոսովը գոմաղբից առնետ է ստեղծել, հայտնում է «Комсомольская правда»-ն։

Քանդակը տեղադրված է Ուոլբա գյուղի գլխավոր փողոցում։ Ռելիեֆային «2020» գրառմամբ պատի ֆոնին դրված են երկու գահեր, որոնցից մեկը դատարկ է, իսկ մյուսին մուշտակով առնետ է նստած։ «Մեզ մոտով Օյմյակոն գնացող շատ զբոսաշրջիկներ են անցնում։ Նրանք հաճախ կանգ են առնում եւ լուսանկարվում իմ քանդակների հետ։ Այդ պատճառով այս տարի որոշել եմ ֆոտոգոտի ստեղծել, որտեղ կարելի է նստել գահին եւ լուսանկարվել առնետի հետ»,- «ՅԱՍԻԱ» գործակալությանը տված հարցազրույցում ասել է Բոպոսովը։

Երկմետրանոց քանդակի վրա աշխատանքը համարյա մեկ ամիս է տեւել։ Դրա համար պահանջվել է երեք տոննա գոմաղբ։ «Ես տասը գլուխ անասուն ունեմ, եւ ամեն օր սահնակներով քիչ-քիչ գոմաղբ էի բերում։ Օրական ընդամենն արել եմ մոտ չորս փոխադրում՝ ամեն անգամ 25 կգ, այսինքն օրական 100 կգ նյութ եմ տեղափոխել»,- պատմել է վարպետը։

Բոպոսովը գոմաղբից արձաններ ամեն ձմեռ է քանդակում։ Առավել հաճախ նա ստեղծում է արեւելյան օրացույցի կենդանիներին։ Անցյալ տարի նա պատրաստել էր երեք խոզուկներ, մինչ այդ՝ սահնակներին լծված շուն, հսկայական աքաղաղ, այծերի ընտանիք, ձիեր եւ օձ։ 2015թ․ քանդակագործը գոմաղբից կերտել էր արմավենիներ, որոնց վրա կապիկներ էին թռչկոտում։ Բացի այդ, նա ստեղծել էր վիշապ, տանկ եւ համացանցում հայտնի Սպասողին։