«Հեռուստատեսության եւ ռադիոյի մասին» գործող օրենքը բազմաթիվ լրացումների կարիք ունի՝ կապված ինչպես ակնհայտ տեխնիկական պատճառների, այնպես էլ մի շարք իրողությունների հետ, որոնք առաջ են եկել վերջին տարիներին մեդիածառայությունների ոլորտում։ Այս մասին «Օրենսդրական փոփոխություններ տեսալսողական մեդիածառայությունների ոլորտում» թեմայով խորհրդարանական լսումների ժամանակ հունվարի 16-ին ասաց խորհրդարանի Գիտության, կրթության, մշակույթի եւ սփյուռքի հարցերի մշտական հանձնաժողովի անդամ, իշխող «Իմ քայլը» խմբակցության պատգամավոր Վահագն Թեւոսյանը։
Նրա խոսքով՝ օրենքի լրացումները պետք է ուղղված լինեն ողջ ոլորտի բարեփոխմանն ընդհանրապես, ինչպես նաեւ գործարարների, հասարակության եւ պետության միջեւ փոխհարաբերությունների պատշաճ կարգավորման ապահովմանը։ «Այս մասին վկայում են ոչ միայն շահառուների հետ առանձին հանդիպումներն ու քննարկումները, որոնց ընթացքում գրանցվել են դիսոնանսներ կամ նույնիսկ որոշ դեպքերում՝ դրանց լիակատար բացակայություն ոլորտի կարգավորման մեթոդների հարցում»,- ասել է Թեւոսյանը՝ խոստովանելով, որ բարեփոխման նախաձեռնությունը հանդիպել է ոլորտի դիմակայությանը։