Արցախում հունվարի 30-ին մահացած զինծառայողի գործով 3 ձերբակալված կա, որոնցից մեկն էլ նախկին պատգամավոր Առաքել Մովսիսյանի (Շմայսի) որդին է: Այս մասին NEWS.am-ի հետ զրույցում ասաց ՀՀ Պաշտպանության նախարար Դավիթ Տոնոյանը:
«Հավատալու կամ չհավատալու խնդիր չկա, մինչեւ չապացուցվի, որ եղել է ինքնասպանություն, որեւիցե մեկը որեւիցե մեկնաբանություն անելու իրավունք չունի: Ես որեւիցե ապացույց չունեմ դեռեւս, որ եղել է ինքնասպանություն, որեւիցե մեկը պնդել, որ եղել է ինքնասպանություն, չի կարող, իրավունք չունի: Հանգամանքները պարզվելու են, 3 ձերբակալված կա, ընդ որում ձերբակալվածներից մեկն այն անձնավորության երեխան է, որի մասին շատ է խոսվում, Առաքել Մովսիսյանի, 3-ն էլ համածառայակիցներ են, որոնց միջեւ եղել է ինչ-որ հարաբերությունների սրում, ինչը բերել է սրան, թե ինչ է եղել արդյունքում, քրեական գործի շրջանակներում կպարզվի, ինչպես եւ պարզվում է նախկին դեպքերը, ամեն ինչ պարզվում է» -ասաց նախարարը:
ՀՀ պաշտպանության նախարարը այս պահին բանակցում է մահացած զինծառայողի հարազատների հետ, որոնք Արմավիր-Երեւան մայրուղիով երթ են անում և ցանկանում են զինվորի դագաղը բերել Երևան։ Զինվորի հարազատները չեն հավատում մահվան պաշտոնական` ինքնասպանության վարկածին:
Դավիթ Տոնոյանը խնդրեց կանգնել եւ չշարունակել երթը դեպի Երեւան:
NEWS.am-ի հետ զրույցում հարազատները պնդում էին, որ կատարվածը սպանություն է: Վահրամը բանակ էր զորակոչվել 6 ամիս առաջ, ծառայում էր Արցախում: Զինվորը մահացել է հունվարի 30-ին՝ ժամը 13:15-ի սահմաններում: Քննչական կոմիտեն հայտարարել է, որ զինվորն իրեն ամրակցված ԱԿՄ տեսակի ինքնաձիգից կրակոցներ է արձակել իր կրծքավանդակի շրջանում և ստացած հրազենային վնասվածքներով տեղափոխվել զինվորական հոսպիտալ, որտեղ ժամը 14:00-ին արձանագրվել է վերջինիս կենսաբանական մահը: Դեպքի առթիվ առաջին կայազորային քննչական բաժնում ՀՀ քրեական օրենսգրքի 110-րդ հոդվածի 1-ին մասով հարուցվել քրեական գործ, կատարվում է նախաքննություն:
