Աֆղանստանի հյուսիս-արեւելքում գտնվող Բադահշան նահանգում նվազագույնը 13 երեխա մահացել է անհայտ հիվանդության հետեւանքով, որը նման է թոքաբորբի ախտանիշներին: TOLOnews հեռուստաալիքի փոխանցմամբ՝ հինգշաբթի այս մասին հայտարարել է տեղական իշխանությունների ներկայացուցիչը:
Նրա տեղեկություններով՝ «Բադահշան նահանգի Յամգան գավառում վերջին 3 օրում առնվազն 13 դեռահաս մահացել է հիվանդության հետեւանքով, որը նման է թոքաբորբի»:
Աֆղանստանի իշխանություններից դեռեւս ոչ մի տեղեկություն չի ստացվել հիվանդության եւ Յամգանում աֆղանստանցի երեխաների մահվան պատճառների մասին:
2019 թվականի դեկտեմբերին Չինաստանի իշխանությունները երկրի խոշոր քաղաք Ուհանում գրանցել էին 2019-nCoV վիրուսի հարուցած թոքաբորբի բռնկում: Չինաստանից բացի, հիվանդությունը հայտնաբերվել է 24 պետություններում, այդ թվում՝ Ռուսաստանում: Առողջապահության համաշխարհային կազմակերպությունը հիվանդության բռնկումը ճանաչել էր միջազգային մասշտաբի արտակարգ իրավիճակ եւ այն բնորոշել որպես բազմաթիվ օջախներով համաճարակ: Ըստ վերջին տեղեկությունների՝ Չինաստանում վիրուսով վարակման դեպքերը անցնում են 28 հազարից, հիվանդության հետեւանքով մահացել է ավելի քան 560 մարդ, առողջացել է 1,1 հազարից ավելին:
