Թաիլանդի իրավապահ մարմիններն օգտագործված բժշկական դիմակներ վաճառող գործարան են լիկվիդացրել, գրում է ՏԱՍՍ-ը:
Սարաբուրիի նահանգային ոստիկանության պետ Սոմսակ Կեուսենի խոսքով` իրավապահներն անօրինական գործունեության մասին տեղեկություն ստանալուց հետո այցելել են գործարան: Ոստիկաններն այնտեղ գործարանի վեց աշխատակցի են հայտնաբերել, որոնք տեսակավորում էին օգտագործված բժշկական դիմակները եւ արդուկում դրանք` նախքան տուփերի մեջ դնելն ու որպես նորը վաճառելը: «Աշխատողները պատմել են, որ յուրաքանչյուր դիմակի դիմաց մեկ բատ (3 ցենտ) են ստացել եւ ամեն օր վերամշակել են մինչեւ 400 դիմակ»,- ոստիկանությանը մեջբերում է The Nation թերթը:
Իրավապահները առգրավել են բոլոր դիմակները եւ դրանց նմուշներն ուղարկել առեւտրի նախարարություն` դրանց ծագումը պարզելու նպատակով փորձաքննություն անցկացնելու համար:
Միեւնույն ժամանակ, սոցիալական ցանցերի թաիլանդական հատվածում մի քանի հրապարակում է հայտնվել լուսանկարներով, որոնցում օգտագործված դիմակներով բացված տուփեր են: Հեղինակներից մեկը պնդում է, որ պատվիրել է դրանք առցանց խանութներից մեկում:
Այս պահին թագավորությունում կորոնավիրուսի հաստատված դեպքերի ընդհանուր թիվը 43 է, բուժվել է 31 մարդ, երկրում գրանցվել է կորոնավիրուսից մեկ մահվան դեպք: