Իրականում ժողովրդի դեմ գործելը ոչ թե խնդիրները մատնանշելն է, այլ նա է, որ այդ խնդիրներն առաջանում են. իսկ խնդիրները առաջանում են, որովհետեւ իշխանությունն ադեկվատ չէ, ոչ մեկին չի ուզում լսել եւ իրենց ընտրած ուղիները անարդյունավետ են: Այս մասին այսօր՝ հունիսի 9-ին, ԱԺ-ում լրագրողների հետ զրույցում նշեց ԲՀԿ խմբակցության քարտուղար Արման Աբովյանը՝ նդրադառնալով Տարածքային կռավարման եւ ենթակառուցվածքների նախարար Սուրեն Պապիկյանի հայտարարությանը, ըստ որի այս իրավիճակում, երբ կառավարությունը պատերազմ է մղում կորոնավիրուսի դեմ, իշխանությանը հարվածելը քայլ է ընդդեմ պետականության:
«Ինչքան էլ փորձեն ապացուցել, որ կաթը սեւ է, միեւնույն է, սպիտակ է: Որքան էլ փորձեք մեզ վարկաբեկել, ձեզ խփեք պատերով, հիստերիկ-հիստերիկ վիճակների մեջ ընկնեք, մեկ է՝ կորոնավիրուսը տարածվում է: Իսկ ինչո՞ւ չեն ասում, որ մինչեւ կորոնավիրուսը մենք արդեն ելքերը եւ մեխանիզմները ասում էինք: Գեթ մեկ անգամ չնստեցին սեղանի շուրջ, ասեն՝ կարող ա էս մարդիկ լուջ բան են ասում»,-ասաց Աբովյանը:
Հարցին, թե արդյոք Գագիկ Ծառուկյանը փորձել է հանդիպել վարչապետին, ԲՀԿ խմբակցության քարտուղարը բացասական պատասխան տվեց. «Ծառուկյանը չի դիմել Նիկոլ Փաշինյանին հանդիպելու համար: Մենք 7 առաջարկ ենք տվել, որը հնարավոր է բեկումնային քայլ լիներ: Գեթ մի անգամ քննարկում չի եղել: Այսքան ժամանակ որեւէ բովանդակային պատասխան չենք լսել: Ասենք, չեն ասել՝ ձեր տնտեսական գնահատականը սխալ է այս-այս պատճառներով:
Իրական դավաճանությունը նա է, որ իշխանությունը հրաժարվում է ընդունել իր սխալները, հրաժարվում է հասկանալ, թե ինչ է կատարվում, չի ուզում նստի, նայի հայելու մեջ ու հասկանա, թե ինչ սխալներ են արել: Իրական դավաճանությունը այն է, որ ասում ես՝ տնտեսական ճգնաժամ է գալիս, իսկ էկնոմիկայի նախարարը պատասխանում է՝ ոչինչ, մեր հաշվարկներով այդքան վտանգավոր չի»: