«Ամեն ինչ սկսվում է մի դրամից» կարգախոսով Իդրամը հայտարարում է ընկերության կորպորատիվ սոցիալական պատասխանատվության՝ «Մի դրամի ուժը» ծրագրի մեկնարկի մասին։
«Մի դրամի ուժը» ուղղված է աջակցելու Հայաստանում կենսական եւ ռազմավարական կարեւորություն ունեցող մի շարք ոլորտների զարգացմանը՝ առողջապահություն, կրթություն, կանաչ տնտեսություն, միջավայրի պահպանություն, սոցիալական պատասխանատվություն եւ հանրային անվտանգություն։ Այսուհետ Իդրամ հավելվածով, կայքով եւ տերմինալների միջոցով հաճախորդների կողմից կատարված բոլոր տեսակի վճարումներից Իդրամն իր ֆինանսական միջոցներից «Մի դրամի ուժը» ծրագրին կտրամադրի 1 ՀՀ դրամ։ Այսպիսով, ցանկացած անձ, ով Իդրամ համակարգով կկատարի վճարում, անմիջապես կդառնա «Մի դրամի ուժը» ծրագրի բարի կամքի դեսպանը՝ առանց մի դրամ ավել ծախսելու։
«Ծրագրի նպատակն է հանրությանը ներկայացնել, թե որքան հեշտ կարելի է դիմակայել մարտահրավերներին եւ լուծել մեր առջեւ ծառացած խնդիրները, երբ բոլորը համախմբված են նույն նպատակի շուրջ։ Այստեղ մի դրամի դերը սիմվոլիկ է եւ ցույց է տալիս, թե որքան մեծ կարող է լինել վերջինիս ուժը, երբ մենք միավորվում ենք եւ մեր «մի դրամներն» ուղղում մեր երկիրը եւ շրջակա միջավայրն ավելի բարեկարգ ու զարգացած դարձնելու նպատակին», - ընկերության տարածած հաղորդագրության մեջ նշել է Իդրամ ՍՊԸ տնօրեն Արսեն Քդենյանը։
Մինչեւ Օգոստոսի վերջ ընկած ժամանակահատվածում հավաքված «մի դրամների» ողջ գումարը կուղղվի ՀՀ սահմանամերձ եւ բարձր լեռնային գյուղերի ու համայնքների աշակերտների համար հեռավար ուսուցման նպատակով անհրաժեշտ սարքավորումների ձեռքբերմանը, իսկ առաջիկայում կհայտարարվի ծրագրի այս տարվա բոլոր շահառու կառույցների եւ նախագծերի շարքը։
Հավաքված «մի դրամների» գումարին իրական ժամանակում կարելի է հետեւել նախագծի idram.am/1dram կայքում, ինչպես նաեւ Իդրամ հավելվածում եւ idram.am կայքում։
