2019-ին ՀՀ արդարադատության նախարարությունն ակտիվորեն պայքարել է երկրում կոռուպցիայի տարբեր դրսեւորումների դեմ: Այս մասին հունիսի 9-ին ՀՀ Ազգային Ժողովում մշտական խորհրդարանական հանձնաժողովների համատեղ նիստին 2019 թվականի պետական բյուջեի կատարողականի վերաբերյալ զեկույցի քննարկմանն ասաց ՀՀ արդարադատության նախարար Ռուստամ Բադասյանը:
Նա, մասնավորապես, նշեց, որ մի քանի միջոցառում է իրականացվել՝ հանրապետության քրեակատարողական հիմնարկներում կոռուպցիան արմատախիլ անելու ուղղությամբ:
«Մենք նաեւ ակտիվ համագործակցել ենք խորհրդարանի հետ: Մասնավորապես, օրենք է ընդունվել հանցավոր ենթամշակույթի դեմ պայքարի վերաբերյալ»,- ասաց նախարարը: Նա նաեւ հայտնեց, որ 2019 թվականին կոյուղու վերանորոգման աշխատանքներ են իրականացվել «Նուբարաշեն» քրեակատարողական հիմնարկում:
«Ինչպես հայտնի է, այս հաստատություններում սննդի նոր համակարգ է ներդրվել: Մասնավորապես, սննդի կազմակերպմամբ այսուհետ զբաղվում են մասնավոր ընկերությունները»,- շեշտեց Բադասյանը:
