2019 թվականին Տարածքային կառավարման եւ ենթակառուցվածքների նախարարությանը հատկացվել է 1,6 մլրդ դրամ փախստականների ինտեգրման ծրագրի իրականացման համար: Այն իրացվել է 99,7 տոկոսով: Այս մասին հունիսի 10-ին ՀՀ Ազգային ժողովում մշտական խորհրդարանական հանձնաժողովների համատեղ նիստին 2019 թվականի պետական բյուջեի կատարողականի վերաբերյալ զեկույցի քննարկման ժամանակ ասաց տարածքային կառավարման եւ ենթակառուցվածքների նախարար Սուրեն Պապիկյանը:
Ծրագրի շրջանակում հատկացված միջոցների հիմնական մասը՝ շուրջ 1,5 մլրդ դրամ ծախսվել է 112 ընտանիքներին բնակմակերես տրամադրելուն, որոնք ստիպված էին եղել Ադրբեջանից փախչել 1988-1992 թվականներին: «Ցանկանում եմ նշել, որ այս ծրագիրը շարունակական է լինելու, եւ արդեն 2020 թվականի բյուջեով միջոցներ են նախատեսված ծրագրի հետագա իրականացման համար»,- հավելեց նախարարը:
