Մեր մարզի համայնքապետերի գերակշիռ մեծամասնությունը նախկին իշխանությունների հետ համագործակցած համայնքի ղեկավարներ են, բայց ընդհանուր առմամբ աշխատանքային պրոցեսը գործընկերային է: Այս մասին այսօր՝ հունիսի 10-ին, ԱԺ-ում լրագրողների հետ զրույցում նշեց Արարատի մարզպետ Գարիկ Սարգսյանը:
«Եթե համայնքի ղեկավարը մտահոգված է համայնքի շահերով, մասնակցում է պետական աջակցության ծրագրերին, սուբվենցիոն ծրագրերին, եղած գումարները ներդնում է համայնքի շենացման համար, մենք այդ համայքների ղեկավարների հետ պատրաստակամ ենք ամենօրյա ռեժիմով աշխատելու: Իսկ օրինակ, Նորաշեն համայնքում խնդիրը լրիվ այլ էր: Մեզ վերապահված լիազորությունների շրջանակներում մենք գործել ենք իրավական առումով ճիշտ, ներկայացրել ենք լիազորմարմնին, որտեղ արդեն ուսումնասիրությունից հետո իրավական գնահատական է տրվել համայնքի ղեկավարի գործողություններին, որի արդյունքում համայնքի ղեկավարի լիազորությունները վաղաժամ դադարեցվել են»,-ասաց նա:
Հարցին, թե րայդոք Արարատի մարզում կան համայնքապետեր, որոնք կեղծիքներով են ընտրվել, մարզպետը պատասխանեց. «Մենք նման ապացուցված փաստեր չունենք, որեւէ մեկին նման մեղքի մեջ մեղարելու իրավունք էլ չունենք: Ամեն ինչ կատարվել է մեր ժողովրդի աչքի առաջ, մարդիկ գիտեն՝ ով ինչպես է ընտրվել: Շատ մեծ թվով համայնքի ղեկավարներ կան, որոնք ուղղակի այլընտրանքային թեկնածու չեն թողել, որ համայնքի բնակիչն ընտրի այլ թեկնածուի: Սա է եղել նախկին իշխանությունների գործելաոճը: Եղել է միակն ու անկրկնելին, որն էլ ընտրվել է»: