ՌԴ նախագահ Վլադիմիր Պուտինն ու Թուրքիայի նախագահ Ռեջեփ Էրդողանը քննարկել են Սիրիայի եւ Լիբիայի իրավիճակը:
Կրեմլի մամուլի ծառայության հաղորդմամբ՝ երկու երկրների առաջնորդները միմյանց շնորհավորել են Ռուսաստանի եւ Թուրքիայի միջեւ դիվանագիտական հարաբերությունների հաստատման 100-ամյակի (1920 թվական, հունիսի 3) կապակցությամբ:
Կողմերն անդրադարձել են կորոնավիրուսի դեմ պայքարին: Նշվել է սահմանափակումների փուլային չեղարկման, ամբողջ ծավալով երկկողմ առեւտրատնտեսական եւ մշակութային-մարդասիրական կապերի վերականգնման կարեւորությունը:
Պուտինը նշել է հրադադարի ռեժիմի պահպանման ու միջլիբիական երկխոսության վերականգնման կարեւորությունը:
Քննարկվել է նաեւ Սիրիայի իրավիճակը: Հատուկ նշվել է Իդլիբի ապաէսկալացիայի գոտու հարցով ռուս-թուրքական համաձայնությունների իրականացման ուղղությամբ ջանքերի ավելացման անհրաժեշտությունը: Համատեղ խնդիրների թվում նշվել է Իդլիբում ահաբեկչական խմբավորումների չեզոքացումն ու հրադադարի ռեժիմի պահպանումը:
