«Ռուսական վարկերից հայկական կողմի հրաժարում» ձեւակերպումը կոռեկտ չէ: Այս մասին հունիսի 11-ին առցանց մամուլի ասուլիսում ասաց Հայաստանում Ռուսաստանի արտակարգ եւ լիազոր դեսպան Սերգեյ Կոպիրկինը:
Նա պարզաբանեց, որ 270 մլն դոլարից 200 մլն դոլարն արդեն ծախսվել է: «Ցավոք, աշխատանքները չեն ավարտվել միջկառավարական համաձայնագրի գործողության ժամկետի լրանալուց հետո: Պատճառները տարբեր են: Հարցը փակված չէ եւ քննարկվում է երկու երկրների ֆինանսների նախարարությունների մակարդակով: Հիմա հայկական կողմը որոշել է աշխատանքների մի մասն իրականացնել սեփական միջոցներով»,- հավելեց դեսպանը:
Նա հիշեցրեց, որ լիցենզիայի ժամկետը լրանում է 2021 թվականին, եւ պետք է անցկացնել բարձրտեխնոլոգիական աշխատանքներ, որոնք երկարատեւ նախապատրաստություն են պահանջում, եւ որպեսզի ժամկետների մեջ տեղավորվի, Հայաստանը որոշել է սեփական միջոցները ներգրավել: «Այս փուլում ԱԷԿ-ի արդիականացման աշխատանքների արդյունքն է դարձել կայանի անվտանգ աշխատանքի երկարաձգումը մինչեւ 2026 թվականը, ինչը հաստատվել է նաեւ ԱԷՄԳ-ի մասնագետների կողմից: Ավելի ժամանակակից տուրբինային սարքավորման շահագործման շնորհիվ հզորության աճը կազմել է 15 տոկոս: Սա թույլ է տալիս ապահովել առավել կարեւոր ճյուղերի պահանջները եւ զգալի ավանդ ունենալ սակագները համեմատաբար ցածր մակարդակում պահելու հարցում»,- եզրափակեց Սերգեյ Կոպիրկինը:
Նշենք, որ Հայաստանը հրաժարվել է Հայակական ԱԷԿ-ի արդիականացման համար ռուսական վարկի մի մասից եւ որոշում է ընդունել բյուջետային վարկերի ներգրավման մասին, որոնք իրականում տրամադրել է ԱՄՀ-ն: