2019 թվականին պետական բյուջեից ՀՀ առողջապահության նախարարության կարիքների համար ծախսվել է 97.6 միլիարդ դրամ: Իրացումը կազմել է 96 տոկոս: Այս մասին հունիսի 12-ին մշտական խորհրդարանական հանձնաժողովների համատեղ նիստին 2019 թվականի պետական բյուջեի կատարողականի վերաբերյալ զեկույցի քննարկմանն ասաց ՀՀ ֆինանսների նախարար Ատոմ Ջանջուղազյանը:
Ընդ որում, ըստ նրա, իսկզբանե նախատեսվում էր 89 միլիարդ դրամ հատկացնել:
«2019-ին, 2018-ի համեմատ, առողջապահության նախարարության համար ծախսերն ավելացել են 22 տոկոսով»,- ասաց նախարարը: Այս միջոցների համար իրականացվել է 12 բյուջետային ծրագիր, որոնցում ներառվել է 64 միջոցառում:
ՀՀ աշխատանքի եւ սոցիալական հարցերի նախարարության կարիքների համար 2019-ին նախապես պլանավորվել էր 444.5 միլիարդ դրամ հատկացնել, սակայն ի վերջո պետբյուջեից տրամադրվել էր 465.5 միլիարդ դրամ:
Պետության տրամադրած միջոցներից ծախսվել է շուրջ 454 միլիարդ դրամ: Իրացումը 97.5 տոկոս է կազմել:
