Instagram սոցիալական ցանցի ղեկավարությունը, որը պատկանում է Facebook-ին, մտադիր է բացահայտել այն խնդիրները, որոնց բախվում են ցանցի սեւամորթ օգտատերերը, եւ միջոցներ ձեռնարկել դրանց լուծման ուղղությամբ: Համապատասխան հայտարարությունը երկուշաբթի օրը սոցիալական ցանցում տեղադրել էր Instagram-ի ղեկավար Ադամ Մոսերին, հայտնում է ՏԱՍՍ-ը:
Ըստ նրա՝ վերջին շաբաթներին Instagram-ի օգտատերերն ամբողջ աշխարհում արդարություն եւ համերաշխության պահանջով են հանդես եկել եւ համերաշխություն են հայտնել սեւամորթ համայնքի ներկայացուցիչների հետ:
«Մինչ օրս մենք մեծ ծավալի աշխատանքներ ենք իրականացրել, որպեսզի հնարավորինս լավ հասկանանք այն ազդեցությունը, որն ունի մեր հարթակը տարբեր խմբերի վրա»,- շեշտել է Մոսերին՝ նշելով, որ, չնայած դրան, որոշ ոլորտներում անհրաժեշտ է ավելի մեծ ջանքեր գործադրել այս ուղղությամբ:
«Մենք պետք է ավելի շատ աջակցենք սեւամորթ համայնքին մեր կազմակերպության եւ մեր հարթակի շրջանակներում»,- շեշտել է նա:
Ինչպես նշել է Instagram-ի ղեկավարը, ընկերության մասնագետները մտադիր են վերանայել սոցիալական ցանցի սեւամորթ օգտատերերի անվտանգության ապահովման մոտեցումը: «Սեւամորթների նկատմամբ անհավասարության վերացմանն ուղղված ցանկացած աշխատանք պետք է սկսվի պարզելուց այն խնդիրները, որոնց հետ նրանք բախվում են ամեն օր ինչպես սոցիալական ցանցի հարթակում, այնպես էլ՝ դրանից դուրս»,- շեշտել է Մոսերին:
Միեւնույն ժամանակ, ընկերությունը պլանավորում է կատարելագործել օգտատերերի էջերի հաստատման համակարգը, ինչը, ինչպես նշել է Մոսերին, հաճախ քննադատվում է, այդ թվում ՝ փոքրամասնությունների նկատմամբ կողմնակալ վերաբերմունքի պատճառով: Սոցիալական ցանցի ղեկավարությունը մտադիր է նաեւ բարելավել հրապարակումների տարածման մեխանիզմները: Մոսերին շեշտել է, որ Instagram-ի բարելավմանն ուղղված աշխատանքը որոշ ժամանակ կպահանջի:
Մինեապոլիսում (Մինեսոտա նահանգ) աֆրոամերիկացի Ջորջ Ֆլոյդի մահը զանգվածային ցույցերի պատճառ էր դարձել ԱՄՆ-ի շատ նահանգներում, որոնք որոշ դեպքերում կողոպուտների եւ ջարդերի էին վերաճել: Մայիսի 25-ին նրա ձերբակալման ընթացքում ոստիկանները խեղդամահ անելու հնարք էին կիրառել, ինչից հետո Ֆլոյդը մահացել էր հիվանդանոցում:
Ձերբակալման մեջ ներգրավված բոլոր չորս ոստիկաններն ազատվել են աշխատանքից, նրանց դեմ մեղադրանքներ են առաջադրվել: Միացյալ Նահանգներից հետո բողոքի ցույցեր էին բռնկվել նաեւ շատ այլ երկրներում:
