Ժողովրդավարական բարեփոխումները մեզ համար գերակայություն են։ NEWS.am-ի թղթակցի հետ զրույցում այս մասին հայտարարեց Հանրապետական կուսակցության մամուլի քարտուղար Էդուարդ Շարմազանով՝ մեկնաբանելով ԵԽ հանձնակատար Թոմաս Համերբերգի՝ նախօրեին հրապարակած, Հայաստանում մարդու իրավունքների վերաբերյալ զեկույցը։
Շարմազանովի խոսքով, Համերբերգի զեկույցում կարեւոր է այն պահը, ուր հանձնակատարը ողջունում եւ դրական է գնահատում Հայաստանի նախագահ Սերժ Սարգսյանի՝ 2008 թվականի մարտի 1-ի գործի հետաքննությունը շարունակելու քայլը։ «Անկախ եվրոպացի գործընկերների զեկույցներից՝ դա մեր երկրի համար շատ կարեւոր հարց է»,- նշեց Շարմազանովը։
Նա նաեւ նշեց, որ ժողովրդավարական բարեփոխումները Եվրոպային դուր գալու համար չեն արվում։ «Սա մեր համոզմունքն է, մենք ենք ընտրել այդ ճանապարհը, եւ իրավապահ մարմինների իրականացրած հետաքննությունը պետք է առավելագույնս բաց եւ հրապարակային լինի»,- ասաց ՀՀԿ մամուլի քարտուղարը։
Նշենք, որ ԵԽ հանձնակատար Թոմաս Համարբերգը մայիսի 9-ին Հայաստանի վերաբերյալ զեկույց էր հրապարակել, որում ողջունել է ձերբակալված ընդդիմադիրների մի մասի ազատարձակումը, նաեւ նշել, որ «2008 թվականի մարտի 1-2-ին անվտանգության ծառայությունների կողմից ուժի կիրառումը անհամաչափ էր»: