Երեւան քաղաքի ընդհանուր իրավասության դատարանի Կենտրոնի նստավայրում, նախագահությամբ դատավոր Աննա Մաթեւոսյանի, այսօր՝ հուլիսի 1-ին, քննվում է ՀՀ պետական վերահսկողական ծառայության՝ լիազորությունները կասեցված պետ Դավիթ Սանասարյանի կողմից 9-ամյա երեխային վրաերթի ենթարկելու փաստի առթիվ հարուցվել է քրգործի կարճման որոշման դեմ տուժողի ներկայացուցիչ Տիգրան Աթանեսյանի կողմից ներկայացված բողոքը։
Քրեական գործով տուժողի ներկայացուցիչ Տիգրան Աթանեսյանը նշեց, որ փորձաքննության եզրակացությունը բավարար չափով պարզ չէ եւ լրիվ չէ, ուստի անհրաժեշտ է նշանակել լրացուցիչ փորձաքննության՝ դա հանձնելով մեկ այլ փորձագետի։
«Փորձագետի կողմից օգտագործված ելակետային տվյալներն ամբողջական չեն։ Մասնավորապես, ավտոմեքենայի արագության վերաբերյալ տվյալը վերցված է վարորդ Սանասարյանի՝ որպես վկա տված ցուցմունքից՝ 10-15 կմ/ժ արագություն։ Մինչդեռ քրեական գործում առկա է Սանասարյանի բացատրությունը, որտեղ նշված է, որ ավտոմեքենայի արագությունը եղել է 5-7 կմ/ժ արագություն։ Այդ պայմաններում փորձագետի կողմից եզրակացության հետազոտական մասում կիրառված բանաձեւը կունենա այլ արդյունք՝ չբացառելով կամ հաստատելով վարորդ Սանասարյանի վրաերթ անելու հնարավորության առկայությունը։ Բացի այդ փորձագետը նշել է, որ վրաերթը տեղի է ունեցել այն ժամանակ, երբ ավտոմեքենան դուրս է եկել կամարանցումից, մինչդեռ տեղի ունեցած վրաերթի դեպքի վայրի զննության կատարված արձանագրության համաձայն՝ վրաերթը տեղի է ունեցել կամարանցման եզրին, որի պայմաններում ակնայտ է։ Փորձագիտական եզրակացության մեջ փորձագետը նշել է, որ տվյալ իրադրության համար կիրառման է ենթակա Ճանապարհային երթեւեկության կանոնների 67-րդ կետը, մինչդեռ ակնհայտ է, որ փորձագետի քրեական գործի նյութերից հայտնի է, որ նշված կամարանցումով մուտք է կատարվում բնակելի գոտի։ Ուստի այս դեպքում, միանշանակ, կիրառելի է 119-ր կետը, որը սահմանում է, որ բնակելի գոտում հետիոտների տեղաշարժը թույլատրվում է ինչպես մայթերով, այնպես էլ երթեւեկելի մասով, բնակելի գոտում հետիոտներն ունեն առավելություն, սակայն իրենք չպետք է խոչընդոտեն տրանսպորտային միջոցների երթեւեկությանը։ Այսինքն՝ տվյալ դեպքում վարորդից պահանջվել է առավել զգոնություն, քանի որ նա մուտք է գործել բնակելի գոտի, գտնվել է սահմանափակ տեսանելիության պայմաններում»,- ասաց Աթանեսյանը։
Տիգրան Աթանեսյանը նշեց նաեւ, որ փորձագետը տասնամյակների վաղեմություն ունեցող գրականություն է օգտագործել։
«Դատարանին խնդրում եմ ՀՀ քննչական կոմիտեի Երեւան քաղաքի քննչական վարչության ճանապարհատրանսպորտային հանցագործությունների քննության բաժնի տեղակալի նշված քրեական գործով կայացված քրեական գործի վարույթը կարճելու մասին որոշումը վերացնել»,- ասաց նա։
Գործով քննիչն էլ նշեց, որ այդ ամբողջ քրեական գործը տրամադրվել է փորձագետին, վերջինս ուսումնասիրել է քրգործում եղած ելակետային տվյալները, եթե որեւէ հակասություն լիներ, ապա նա համապատասխան միջնորդություն կներկայացներ վարույթն իրականացնող մարմնին։
«Այդ գրականությունն օգտագործվում է ամբողջ աշխարհում։ Ֆիզիկայի օրենքները նույնն է եւ արգելակային համակարգը բոլոր մեքենաների մոտ նույն եղանակն է»,- ասաց նա։
Բողոքի քննությունը հետաձգվեց եւ նշանակվեց հուլիսի 13-ին, ժամը 10։00-ին։
