Եվրամիության արտաքին կապերի պաշտոնական ներկայացուցիչը հանդես է եկել հայտարարությամբ` կապված հայ-ադրբեջանական սահմանին տեղի ունեցած բախումների հետ:
«2020 թ. հուլիսի 12-13-ը Հայաստանն ու Ադրբեջանը հաղորդել են իրենց սահմանին լուրջ միջադեպի, այդ թվում՝ ծանր զենքի օգտագործման մասին: Դժբախտաբար, սա հանգեցրել է մարդկանց մահվան:
ԵՄ-ն երկու կողմերին կոչ է անում դադարեցնել զինված դիմակայությունը, զերծ մնալ լարվածություն հրահրող գործողություններից եւ հռետորաբանությունից եւ անհապաղ միջոցներ ձեռնարկել հետագա էսկալացիան կանխելու համար:
Այս համատեքստում երկու կողմերը պետք է օգտագործեն իրենց անմիջական հաղորդակցության մեխանիզմը, ԵԱՀԿ Մինսկի խմբի համանախագահների, ինչպես նաեւ ԵԱՀԿ գործող նախագահի անձնական ներկայացուցչի ձեւաչափը»,- նշվում է հայտարարության մեջ:
Պաշտոնական ներկայացուցիչը նշել է, որ հրադադարի այս լուրջ խախտումը ընդգծում է ԵԱՀԿ դիտանցումը վերսկսելու հրատապ անհրաժեշտությունը, հենց հանգամանքները թույլ տան:
ԵՄ-ն կողմերին կոչ է անում անշեղորեն պահպանել հրադադարի ռեժիմը, էներգիան եւ ռեսուրսներն ուղղել կորոնավիրուսի համավարակի դեմ պայքարին, էականորեն վերսկսել առարկայական բանակցությունները՝ ԵԱՀԿ Մինսկի խմբի համանախագահների հովանու ներքո, եւ իրենց ժողովուրդներին պատրաստել խաղաղության:
