Մայիսի 13-ին ժամը 01:30-ի սահմաններում Արցախի փողոցի թիվ 1 շենքի դիմաց տեղի է ունեցել վրաերթ, որն ավարտվել է մահով:

Ինչպես NEWS.am-ին հայտնում է ֆոտոլրագրող Գագիկ Շամշյանը, 36-ամյա Արշակ Մաթեւոսյանը, վարելով Volkswagen Passat  մակինիշի 19 ՏՍ 444 համարանիշի ավտոմեքենան, վրաերթի է ենթարկել 64-ամյա թոշակառու Արարատ Ջանոյանին եւ թողնելով անօգնական վիճակում , դեպքի վայրից դիմել է փախուստի:

Վրաերթի ենթարկվածը տեղում մահացել է:

Դեպքի վայր էին ժամանել ոստիկանության քննչական գլխավոր վարչության Երեւանի քննչական վարչության ճանապարհատրանսպորտային հանցագործությունների քննության բաժնի  պետի ժամանակավոր պաշտոնակատար Լեւոն Շմավոնյանն ու ՃՏՀ քննության բաժնի ավագ քննիչ Մանվել Մուրադյանը: Դեպքի վայր էին ժամանել նաեւ Երեւանի Ճանապարհային ոստիկանության աշխատակիցները, ՃՈ պետ Արսեն Մարդոյանի գլխավորությամբ:

Ականատեսները պատմել են, որ Volkswagen Passat-ի վարորդին դեպքի վայրից փախուստի դիմելիս հետապնդել են Երեւանի ՃՈ աշխատակիցները, ովքեր էլ նրան բերման են ենթարկել Ճանապարհային ոստիկանություն:

Երբ ֆոտոլրագրողը փորձել է նկարահանել նրան, վրաերթի հեղինակը ցինիկաբար հայտարարել է, թե. «Խմել եմ, նստել քշել եմ»:

Պարզվել է, որ նա աշխատում է Հայաստանի Պետական եկամուտների կոմիտեի Տեղեկատվական տեխնոլոգիաների վարչությունում որպես ավագ հարկային տեսուչ:

Բժշկական հետազոտությամբ պազրվել է, որ նա եղել է ոչ սթափ վիճակում:

 

Լուսանկարները եւ տեսանյութը՝ Գագիկ Շամշյանի