eBay-ը բանակցություններ է վարում առցանց հայտարարությունների eBay Classifieds Group իր բիզնեսը 8 միլիարդ դոլարով նորվեգական Adevinta-ին վաճառելու մասին, հայտնում է Wall Street Journal- ը (WSJ)՝ վկայակոչելով մի քանի աղբյուրների:
Տեղեկատվությունն այն մասին, որ eBay-ը փնտրում է շուկայում առցանց հայտարարությունների առաջատար Classifieds Group ստորաբաժանման պոտենցիալ գնորդների, հայտնվել է այս տարվա փետրվարին: Այն ժամանակ ծառայությունը գնահատվում էր 12 միլիարդ դոլար, սակայն COVID-19 համավարակը վնասեց բիզնեսին, եւ այժմ ընկերությունը ակնկալում է այն վաճառել գոնե 8 միլիարդ դոլարով, ասում են WSJ-ի աղբյուրները: Ընդ որում, Adevinta-ի հետ գործարքը կձեւակերպվի ինչպես կանխիկ, այնպես էլ բաժնետոմսերով, հայտնում է «Կոմերսանտը»:
Classifieds Group-ի վաճառքը կդառնա eBay-ի զարգացման երկարաժամկետ ռազմավարության մասը: Դեռեւս 2015-ին eBay-ը դուրս եկավ PayPal վճարային ծառայությունից՝ որպես առանձին ընկերություն: Անցյալ տարի ակտիվիստ ներդրողները, որոնք մասնաբաժին ունեն eBay-ում, այդ թվում՝ Elliott Management եւ Starboard Value ներդրումային ֆոնդերը, ավելացրեցին ճնշումը ընկերության ղեկավարության վրա՝ կոչ անելով նրան հրաժարվել բոլոր ոչ հիմնական ակտիվներից: Այս տեսակետը չի կիսել առցանց աճուրդի այն ժամանակվա գլխավոր տնօրեն Դեւին Վենիգը, ով, ի վերջո, ստիպված էր հեռանալ իր պաշտոնից սեպտեմբերին: Եվ արդեն անցած տարվա նոյեմբերին ընկերությունը 4,05 միլիարդ դոլար է ստացել Viagogo-ից, որը eBay-ից գնել է StubHub տոմսերի վաճառքի ծառայությունը:
EBay-ի առցանց հայտարարությունների ծառայությունը գործում է Միացյալ Նահանգներից դուրս` Կանադայում, Մեքսիկայում, Ավստրալիայում, եւ Եվրոպայի ու Աֆրիկայի որոշ երկրներում: Անցյալ տարի նրա եկամուտը կազմել է 1,1 միլիարդ դոլար՝ համեմատած eBay-ի աճուրդային բիզնեսից 7,6 միլիարդ դոլարի հետ:
Adevinta-ն 16 երկրներում, հիմնականում Եվրոպայում, Մեքսիկայում եւ Լատինական Ամերիկայում, թվային առեւտրային հարթակներ է կառավարում: Ընդ որում, նորվեգական ամբողջ ընկերության շուկայական արժեքը կազմում է 8 միլիարդ դոլարից քիչ ավելի։ Մոտավորապես այդքան է առցանց հայտարարությունների ծառայության իր բիզնեսը գնահատում eBay-ը։