Ընթացիկ տարվա 5 ամիսներին Հայաստանում արդյունաբերությունը ոչ թե անկում է գրանցել, այլ 2,4 տոկոսով աճ: Սակայն 2020 թվականի առաջին 6 ամիսներին այս ոլորտը գրանցել է 0,9 տոկոսով անկում: Այս մասին հուլիսի 28-ին լրագրողների հետ հանդիպման ժամանակ ասաց Հայաստանի Հանրապետական կուսակցության նախկին պատգամավոր, տնտեսագետ Գագիկ Մինասյանը:
Նախկին պատգամավորը նշեց, որ այսպիսով աճը կազմել է միայն 1,5 տոկոս:
«Սակայն հասկանալու համար, թե այս աճն ինչով է պայմանավորված, անհրաժեշտ է դիմել «կախարդական փայտիկին», որի մասին հիշատակել է մի հայտնի քաղաքական գործիչ (Հայաստանի վարչապետ Նիկոլ Փաշինյանը – խմբ.): Խոսքը լեռնահանքային արդյունաբերության մասին է: Առաջին 5 ամիսներին մեր լեռնահանքային արդյունաբերությունն աճել է 25 տոկոսով: Սա չափազանց լուրջ եւ խայտառակ թիվ է, հատկապես այն իշխանության համար, որն իր նախընտրական խոստումների շրջանակում հայտարարել էր, որ հանրապետությունը դարձել է այլ երկրների համար լուրջ կցորդ, եւ եթե իրենք իշխանության գան, ապա այս էջը կշրջեն՝ Հայաստանը վերածելով բարձր տեխնոլոգիաներով երկրի: Եվ ահա, այս կերպ Հայաստանի լեռնահանքային արդյունաբերությունն աճել է ամբողջ 25 տոկոսով: Ընդ որում՝ վերջին ամսում այս միտումն ավելի է խորացել: Որպես օրինակ բերեմ երկու հանգամանք՝ ասածս հաստատելու համար: Նույնիսկ Տավուշի մարզում սահմանին սրացման եւ ռազմական գործությունների ժամանակ Ամուլսարի ոսկու հանքավայրը բացելու փորձեր են ձեռնարկվել: Այսինքն՝ նույնիսկ այդ ժամանակաշրջանում եւս մեկ լեռնահանքային ձեռնարկություն գործարկելու փորձեր են ձեռնարկվել, որովհետեւ ամենայն հավանականությամբ, առանց լեռնահանքային արդյունաբերության աջակցության այս ոլորտը պետք է գրանցի ավելի համեստ ցուցանիշներ»,- պարզաբանեց նախկին պատգամավորը: