Սիրելի հայրենակիցներ, բուժաշխատողներ, սիրով տեղեկացնում ենք, որ մի խումբ համախոհ բժիշկներով ստեղծել ենք «Արժանապատիվ բուժաշխատողների միություն» հասարակական կազմակերպությունը։
Նման նախաձեռնության կյանքի կոչվելու համար խթան է հանդիսացել վերջին ժամանակներում բուժաշխատողների հանդեպ իրականացվող աննախադեպ ճնշումները, իրավունքների ոտնահարումները, մասնագիտական դիրքորոշման և տեսակետի արտահայտման համար հետապնդումներն ու հալածանքները։
Երբեք բուժաշխատողների կարծիքը առողջապահական համակարգի կառավարիչների և պաշտոնյաների կողմից այդքան արհամարված ու անտեսված չի եղել։
Սպիտակ խալաթ կրողի դերն ու նշանակությունը մեր կյանքում չգնահատած, բժշկական աշխարհը պառակտած, այլ ոչ միավորած, գիտական, ակադեմիական և փորձագիտական շրջանակները յուրայինների և օտարների բաժանած առողջապահական համակարգի պատասխանատուները տեղ չպետք է ունենան մեր իրականության մեջ։
Այսօր մասնագիտական այլակարծությունը հետապնդվում է մեծամիտ, բարդույթավորված ու քինախնդիր ինքնահավանների մի շրջանակի կողմից՝ ընդհուպ մինչև աշխատանքից ազատման սպառնալիք, ազատում, աշխատանքի ընդունման արգելանք, հոգեբանական ճնշումներ և այլն։
Ցանկացած սեփական տեսակետ և հանրային դիրքորոշում ունեցող բուժաշխատող, ով բաց ձևով արտահայտում է դա, դառնում է այդ շրջանակի հարձակումների և հալածանքների թիրախ։
Սիրելի արժանապատիվ բուժաշխատողներ, առողջապահական համակարգը հիմնարար սանացիայի ենթարկելու ժամանակն է եկել։ Ձեզանից յուրաքանչյուրը կարող է ներդրում ունենալ այդ գործում, հաղթահարելով սեփական անհաղորդությունը առկա մարտահրավերների նկատմամբ ու տարատեսակ վախերը։
Լռելու դեպքում առողջապահական համակարգի կազմաքանդման վտանգը ծեծելու է մեր բոլորի դռները։
Կոչ ենք անում բոլորին միավորվել, հրավիրում ենք անդամակցելու այս նորաստեղծ միությանը։
Մենք պարտավորվում ենք յուրաքանչյուրի ձայնը, որը բխում է այս միության նպատակներից, լսելի դարձնել բոլոր հնարավոր հարթակներում: Ներկայացնելով իրական խնդիրները, բացահայտելով ճշմարտությունը և լուսավորելով, մենք կնպաստենք համակարգում բարոյահոգեբանական մթնոլորտի էական փոփոխմանը:
Միասին մենք կարող ենք հասնել առողջապահության համակարգի արմատական առողջացմանը՝ ի նպաստ մեր ժողովրդի առողջության պահպանման և բժշկագիտության զարգացման։ Աստված մեզ օգնական և պահապան։
«Արժանապատիվ բուժաշխատողների միություն» ՀԿ Նախագահ պրոֆ. Սամվել Գրիգորյան
