ՌԴ-ում Հայաստանի դեսպանատունը կոչ է անում հայրենակիցներին չտրվել սադրանքների Արցախի դեմ Ադրբեջանի ագրեսիայի կապակցությամբ:
«Տեղեկացնում ենք, որ վաղ առավոտից Դեսպանատունը ստանում է բազմաթիվ զանգեր եւ նամակներ հայրենակիցներից Ադրբեջանի կողմից Արցախի եւ դրա խաղաղ բնակչության դեմ սկսված ռազմական գործողությունների կապակցությամբ:
Ստեղծված իրավիճակի կապակցությամբ խնդրում ենք Ռուսաստանում բնակվող մեր բոլոր հայրենակիցներին լինել զգոն եւ չմասնակցել ինչ-որ նախաձեռնությունների եւ հավաքների, իսկ սադրիչ դրսեւորումների դեպքում պարտադիր դիմել դեսպանատուն:
Նշենք նաեւ, որ մեր քաղաքացիները, որոնք ցանկանում են մեկնել հանրապետություն, կարող են կապ հաստատել հետեւյալ հեռախոսահամարով. +7(966) 118 - 89-84 կամ իրենց տվյալներն ուղարկել [email protected] էլ.փոստի հասցեին:
Միաժամանակ Ձեր ուշադրությանն ենք ներկայացնում այն, որ բացի ռազմական գործողություններից, հակառակորդն ակտիվորեն ապատեղեկատվություն է տարածում, մասնավորապես, սոցիալական ցանցերում տարբեր գործողություններ հրահրելու, այդ թվում՝ նաեւ տարբեր երկրներում հայ համայնքի ներկայացուցիչներին սադրելու նպատակով:
Խնդրում ենք ձեզ զերծ մնալ չստուգված, ոչ պաշտոնական տեղեկատվության տարածումից, առաջնորդվել բացառապես պաշտոնական աղբյուրներով (mil.am) եւ չտրվել սադրանքի»,-ասված է դեսպանատան ֆեյսբուքյան հաղորդագրության մեջ: