Գերմանիան Ռուսաստանին եւ Թուրքիային կոչ է արել օգտագործել «հատուկ» ազդեցությունն Անդրկովկասում Հայաստանի եւ Ադրբեջանի հակամարտության երկարաժամկետ կարգավորման համար: Այս մասին հայտարարել է Գերմանիայի արտաքին գործերի պետնախարար Միխայել Ռոտը, հաղորդում է «ՌԻԱ Նովոստի»-ն:
«Լեռնային Ղարաբաղում հակամարտության դրամատիկ էսկալացիան ցույց է տալիս, որ սառեցված հակամարտությունները պետք է կարգավորել, այլապես դրանք մշտապես կբռնկվեն: Մենք մշտական շփման մեջ ենք Հայաստանի եւ Ադրբեջանի, ինչպես նաեւ տարածաշրջանում մյուս գործընկերների հետ»,-ասել է նա՝ ելույթ ունենալով Բունդեսթագում լսումների ժամանակ:
Նա հիշեցրել է, որ ՄԱԿ-ի ԱԽ-ը բանաձեւ է ընդունել, որում կոչ է անում դադարեցնել մարտերը:
«Ռուսաստանն ու Թուրքիան, որոնք հատուկ ազդեցություն ունեն տարածաշրջանում, պետք է լրջորեն ազդեն երկարաժամկետ կարգավորման համար: Մենք առաջին հերթին ակցենտը դնում ենք Մինսկի խմբի վրա»,-հավելել է Ռոտը: