Արցախում սեպտեմբերի 27-ից հոկտեմբերի 4-ը ադրբեջանական ագրեսիայի հետեւանքով զոհվել է 19 մարդ, այդ թվում՝ 1 երեխա, 7 կին եւ 11 տղամարդ: Բոլոր զոհերի կեսը 50-ն անց մարդիկ են: Այս մասին հոկտեմբերի 5-ին լրագրողների հետ հանդիպմանն ասաց Արցախի մարդու իրավունքների պաշտպան Արտակ Բեգլարյանը:
Նա բացատրեց, որ քաղաքացիների մահը տեղի է ունեցել կամ հրթիռային հարձակումների, կամ հրետանային հարձակումների, կամ ԱԹՍ-ների, կամ օդային հարվածների հետեւանքով:
«Ադրբեջանական ագրեսիայի հետեւանքով վիրավորվել է ավելի քան 80 մարդ, նրանցից 60-ը լուրջ վնասվածքներ են ստացել, այդ թվում՝ առնվազն 4 երեխա: 60 դեպքից 24-ը գրանցվել է բնակելի տարածքում, 6 դեպք՝ հասարակական վայրերում»,- հավելեց օմբուդսմենը:
Արտակ Բեգլարյանը նկատեց, որ երկրի ամենակարեւոր ենթակառուցվածքների ոչնչացումը հանցագործություն է մարդկության դեմ, եւ կասետային հրթիռների գնդակոծության հետեւանքով կան ոչ միայն հումանիտար ճգնաժամի, այլեւ հումանիտար աղետի ռիսկեր:
«Ամեն ինչ արվում է քաղաքացիներին ահաբեկելու համար: Ադրբեջանի զինված ուժերի մոտ մնացել են Արցախի զոհված զինծառայողների մարմիններ, եւ հաշվի առնելով 2016-ի ապրիլին ռազմական հանցագործությունների դեպքերը, ռիսկեր կան, որ այս անգամ էլ կարող են գրանցվել նման դեպքեր, կոչ եմ անում միջազգային հանրությանը ուշադրություն դարձնել այս հանգամանքին»,- եզրափակեց նա:
