ՀԱՊԿ խաղաղապահ ուժերի մասնակցությամբ «Անխախտ եղբայրություն-2020» հրամանատարա-շտաբային զորավարժությունները այսօր մեկնարկում են Բելառուսում։ Այս մասին հայտնում է «Sputnik Բելառուսը»՝ վկայակոչելով երկրի պաշտպանության նախարարության մամուլի ծառայությանը։
Վիտեբսկի մարզի «Լոսվիդո» պոլիգոնում զորավարժություններն ընթանալու են հոկտեմբերի 12-16-ը։ Երկուշաբթի տեղի կունենա հանդիսավոր բացումը։ Զորավարժություններին մասնակցելու են ՀԱՊԿ անդամ երկրների զորակազմերը, Միացյալ շտաբի եւ ՀԱՊԿ քարտուղարության օպերատիվ խմբերը, ոստիկանական (միլիցիայի) ուժեր եւ արտակարգ իրավիճակների նախարարությունների ստորաբաժանումներ։
«Զորավարժությունների մասնակիցների ընդհանուր թվաքանակը կազմում է ավելի քան 700 մարդ եւ ավելի քան 100 միավոր ռազմական եւ հատուկ տեխնիկա, այդ թվում՝ ուղղաթիռներ եւ ԱԹՍ-ներ։ Նախատեսվում է զորավարժություններին Կարմիր խաչի միջազգային կոմիտեի ներկայացուցիչների մասնակցությունը որպես դիտորդներ»,- հայտնել են Բելառուսի պաշտպանության նախարարությունից։
«Անխախտ եղբայրություն» զորավարժությունների առաջին փուլում անցկացվելու է ՀԱՊԿ Հավաքական խաղաղապահ ուժերի (ՀԽՈՒ) պատրաստում։ Երկրորդ փուլում նախատեսվում է մշակել ՀԱՊԿ ՀԽՈՒ պրակտիկ գործողությունները խաղաղության պահպանման գործողություններ անցկացնելու ընթացքում։
Հիշեցնենք, որ ՀԱՊԿ «Անխախտ եղբայրություն» զորավարժությունները 2012 թվականից անցկացվում են ամեն տարի կազմակերպության անդամ երկրներից մեկի տարածքում։ Այս տարի նախատեսված էր, որ զորավարժություններին մասնակցելու են ՀԱՊԿ անդամ 6 պետությունների ստորաբաժանումները՝ Ռուսաստանի, Բելառուսի, Հայաստանի, Ղազախստանի, Ղրղզստանի եւ Տաջիկստանի։ Օրերս հայտնի դարձավ, որ Հայաստանի զինվորականները զորավարժություններին չեն մասնակցելու Լեռնային Ղարաբաղում հակամարտության սրման պատճառով։