Քաղբանտարկյալների ազատ արձակումը Հայ ազգային կոնգրեսի համար կարեւորագույն հարց է, որը ՀԱԿ-ը կներկայացնի որպես սեփական քաղաքական հաղթանակ։ Մայիսի 26-ին այս մասին հայտարարեց Կովկասի ինստիտուտի տնօրեն Ալեքսանդր Իսկանդարյանը՝ նշելով, որ համաներման փաստը կանդրադառնա նաեւ երկրի ներքաղաքական կյանքի վրա։
«Համաներումը կարեւոր է նաեւ իշխանության համար, որը սա կներկայացնի իբրեւ միջազգային տարբեր կազմակերպությունների կողմից պահանջված կոնսենսուս։ Նախընտրական շրջանում սա արտաքինից քաղաքական մեծ նշանակություն կունենա»,- նկատեց Իսկանդարյանը։
Ինչպես ավելի վաղ հայտնել էր NEWS.am-ը, խորհրդարանը 91 «կողմ» եւ 1 ձեռնպահ ձայներով ընդունել էր անկախության 20-ամյակին նվիրված համաներման մասին նախագիծը։ «Դեմ» ոչ ոք չի քվեարկել»։
Նշենք, որ Արդարադատության նախարար Հրայր Թովմասյանը հայտարարել է, որ
համաներումը կտարածվի 2008 թվականի մարտի 1-ի գործով դատապարտված Նիկոլ Փաշինյանի եւ Սասուն Միքայելյանի վրա։
