Նոր օրենքը վերաբերում է ոչ միայն տուգանքներին եւ տույժերին, ինչպես նախորդ դեպքերում էր, այլեւ` ընդհանուր վարկային պարտավորությանը: Այսինքն` այս դեպքում խոսքը վարկի մայր գումարի մասին է: Այս մասին հոկտեմբերի 28-ին լրագրողների հետ հանդիպմանը հայտարարեց Հայաստանի ֆինանսների փոխնախարար Արման Պողոսյանը` ներկայացնելով Հարկային օրենսգրքում փոփոխություն կատարելու մասին վերջերս ընդունված օրենքը:
Փոխնախարարի խոսքով` օրենքը բանկերին եւ վարկային կազմակերպություններին հնարավորություն է տալիս ներել մի քանի կարգի անձանց վարկային պարտավորությունները` ռազմական գործողությունների արդյունքում սպանվածների, անհայտ կորած կամ հաշմանդամ դարձածների, ինչպես նաեւ վերոնշյալ անձանց ամուսինների, ծնողների կամ երեխաների: Պողոսյանը շեշտեց, որ այս որոշումը միայն առաջարկ է բանկերի եւ վարկային կազմակերպությունների համար, սակայն` ոչ պարտադրանք:
