Բանգլադեշի ամենամեծ իսլամիստական խմբավորումը կառավարությունից պահանջել է 24 ժամվա ընթացքում խզել դիվանագիտական հարաբերությունները Ֆրանսիայի հետ, հայտնում է Reuters-ը:
Տասնյակ հազարավոր մահմեդականներ ամբողջ Բանգլադեշում` աշխարհի երրորդ ամենամեծ մահմեդական երկրում, որի բնակչությունը գերազանցում է 160 միլիոնը, բողոքում են Ֆրանսիայի նախագահ Էմանուել Մակրոնի` Մուհամեդ մարգարեի ծաղրանկարների հետ կապված հայտարարությունների դեմ:
Դաքայում հազարավոր ցուցարարներ պահանջում են բոյկոտել ֆրանսիական ապրանքները եւ դադարեցնել երկրի կապերը Փարիզի հետ:
«Մենք կառավարությանը վերջնագիր ենք տալիս` 24 ժամվա ընթացքում Ֆրանսիայի հետ դիվանագիտական հարաբերությունները խզելու համար»,- ասել է Hefazat-e-Islam-ի ղեկավար Ջունաեդ Բաբունագարին: «Եթե մեր պահանջները չբավարարվեն, մենք կհայտարարենք գործողությունների հաջորդ փուլի մասին»,- ասել է նա
Բանգլադեշի կառավարությունը չի արձագանքել իսլամիստական կուսակցությունների պահանջներին:
«Մենք ոչ ոքի կողմը չենք բռնի»,- ասել է արտաքին գործերի նախարարության բարձրաստիճան պաշտոնյան, որը հրաժարվեց նշել իր անունը` հավելելով, որ Ֆրանսիայի դեսպանատանը խստացվել են անվտանգության միջոցառումները:
