2020 թվականին աշխատավարձերի վճարման համար ընդհանուր առմամբ հատկացվել է 89 մլրդ 784 մլն դրամ։ 2019 թվականի համեմատ աճը կազմել է 2,8 տոկոս։ Այս մասին նոյեմբերի 3-ին Ազգային ժողովում Ֆինանսավարկային եւ բյուջետային հարցերի մշտական խորհրդարանական հանձնաժողովի նիստին 2021 թվականի բյուջեի նախագծի քննարկման ժամանակ ասաց «Լուսավոր Հայաստան» կուսակցության պատգամավոր Արկադի Խաչատրյանը։
Աշխատավարձերի եւ լրացուցիչ վճարումների համար հատկացվել է 66 մլրդ 992 մլն դրամ։ Աճը կազմել է 2,4 տոկոս՝ անցյալ տարվա համեմատ։
«Ընդ որում՝ պարգեւավճարների, դրամական խրախուսումների վճարման եւ հատուկ վճարումների համար հատկացվել է 18 մլրդ 825 մլն դրամ։ Աճը կազմել է 21,7 տոկոս։ Եվ վերջում՝ քաղաքացիական, պետական եւ դատական ոլորտների աշխատակիցների պարգեւավճարների վճարման համար հատկացվել է 9 մլրդ 966 մլն դրամ»,- ասաց Խաչատրյանը։
