ԵՄ արտգործնախարարները այդպես էլ որոշում չեն կայացրել Թուրքիայի դեմ պատժամիջոցների վերաբերյալ՝ կապված Միջերկրական ծովի արեւելյան հատվածում նրա վարած քաղաքականության հետ՝ հարցը թողնելով դեկտեմբերի 10-11-ը կայանալիք գագաթաժողովի ընթացքում ԵՄ առաջնորդների հայեցողությանը, հայտնում է Reuters-ը:
27 նախարարները, որոնց հանձնարարվել էր գնահատել Անկարայի նկատմամբ տնտեսական պատժամիջոցների հիմնավորումը, միայն համաձայնության են եկել, որ Թուրքիան սրել է լարվածությունը հոկտեմբերից, երբ ԵՄ ղեկավարները սպառնացել էին պատժիչ միջոցներ կիրառել դեկտեմբերին:
«Ցավոք, վերջին նիստից հետո մենք մեծ առաջընթաց կամ բարելավում չենք տեսել»,- լրագրողներին ասել է ԵՄ գլխավոր դիվանագետ Ժոզեպ Բորելը՝ նկատի ունենալով հոկտեմբերի 1-2-ը կայացած գագաթաժողովը, երբ ԵՄ առաջնորդները ժամանակ տվեցին Անկարային՝ դիվանագիտական լուծում գտնելու համար: «Թուրքիայի վարքի մեջ մենք ուղղության արմատական փոփոխություն չենք տեսել: Ընդհակառակը, որոշ առումներով իրավիճակը սրվել է»,- ասել է Բորելը:
Թուրքիայի նախագահ Թայիփ Էրդողանը հայտարարել է, որ իր երկիրը «չի ենթարկվի սպառնալիքների եւ շանտաժի», սակայն կրկնել է տարաձայնությունների շուրջ բանակցելու իր կոչը։
Հունաստանի արտաքին գործերի նախարար Նիկոս Դենդիասը Twitter-ում հայտնել է, որ «Թուրքիայի դիրքորոշումը մարտահրավեր է ամբողջ ԵՄ-ի համար»:
Գերմանիան՝ ԵՄ ներկայիս նախագահը, պատժամիջոցների կիրառման խնդրի լուծման բանալին է: Նա հույս ուներ միջնորդ դառնալ Աթենքի եւ Անկարայի միջեւ, բայց վրդովվեց, երբ Թուրքիան դադարից հետո հոկտեմբերին վերսկսեց Կիպրոսում գազի որոնման աշխատանքները:
«Գագաթաժողովում որոշում կլինի»,- հանդիպումից հետո ասել է Գերմանիայի արտաքին գործերի նախարար Հեյկո Մաասը: «Թուրքական սադրանքները բազմիցս են կրկնվել: Այդ պատճառով ԵՄ գագաթաժողովը պետք է որոշի, թե ինչպես լուծել այդ հարցը»:
