Բոլոր կրիպտոարժույթների ընդհանուր շուկայական արժեքն առաջին անգամ գերազանցել է 1 տրիլիոն դոլարը, քանի որ բիթքոինի գինը հասել է իր բոլոր ժամանակների ամենաբարձր ցուցանիշներին, փոխանցում է Reuters-ը:
Հինգշաբթի օրը բիթքոինի գինն ավելացել էր եւ մարտին գրանցված 3.850 դոլարից հասել էր 38655 ԱՄՆ դոլարի: Սա մտահոգություններ էր առաջացրել գնաճի եւ դոլարի արժեզրկման հետ կապված: Կրիպտոարժույթը թափ է հավաքում հիմնական այն ներդրողների շրջանում, ովքեր ավելի ու ավելի են համոզվում, որ բիթքոինը երկարաժամկետ ակտիվ կլինի, այլ ոչ թե` սպեկուլյատիվ փուչիկ, ինչպես կարծում են որոշ վերլուծաբաններ եւ ներդրողներ:
Chainlink-ի համահիմնադիր Սերգեյ Նազարովն ասել է, որ «հավատքի պակաս կա ավանդական հաստատությունների նկատմամբ, որն այս մեծ ռալին դեպի կրիպտոակտիվներ է տանում»: «Չնայած արտաքին դիտորդները կարող են ավելի քան 1 տրիլիոն դոլար գնահատվող կրիպտոարժույթի արդյունաբերությունն աներեւակայելի կարեւոր նշաձող համարել` մեր ոլորտն իրականում դեռ զարգացման եւ աճի ամենավաղ փուլերից մեկում է գտնվում»,- ասել է Նազարովը:
CoinMarketCap-ի տվյալների համաձայն` բոլոր կրիպտոարժույթների շուկայական գագաթը հինգշաբթի աճել է 10 տոկոսով եւ կազմել 1.042 տրիլիոն դոլար: Բիթքոինին բաժին է ընկնում կրիպտոարժույթների ընդհանուր շուկայական կապիտալիզացիայի մոտ 69 տոկոսը: Դրան հաջորդում է Ethereum-ը` 13 տոկոս բաժնեմասով:
