Վաշինգտոնում Կապիտոլիումի դիմաց անկարգությունների ժամանակ ԱՄՆ Ներկայացուցիչների պալատի խոսնակ, դեմոկրատ Նենսի Փելոսիի ամբիոնը դուրս բերած տղամարդուն գրավի դիմաց ազատ են արձակել, հաղորդում է ՏԱՍՍ-ը՝ հղում անելով Associated Press-ին:
Ըստ գործակալության տվյալների՝ 25 հազար դոլարի չափով գրավի գումարը սահմանվել է երկուշաբթի կարճ դատական նիստի ընթացքում: 36-ամյա Ադամ Ջոնսոնը զրկվել է ճանապարհորդելու հնարավորությունից, ինչպես նաեւ պարտավորվել հետեւել պարեկային ժամը 21:00-ից մինչեւ 06:00: Տղամարդը ձերբակալվել էր անցած շաբաթ ԱՄՆ արդարադատության նախարարության խնդրանքով:
АP-ի տեղեկություններով՝ ավելի ուշ ամբիոնը, որի արժեքը գնահատվում է հազար դոլար, հայտնաբերվել է Կոնգրեսի շենքի միջանցքներից մեկում:
Հունվարի 6-ին Թրամփի կողմնակիցները ներխուժել էին ԱՄՆ Կոնգրեսի շենք՝ փորձելով խոչընդոտել նոյեմբերի 3-ին կայացած նախագահական ընտրությունների արդյունքների հաստատմանը, որում հաղթել է դեմոկրատ Ջոզեֆ Բայդենը: Կոնգրեսում դեմոկրատները Թրամփին մեղադրել են խռովություն հրահրելու մեջ եւ պահանջել իշխանությունից նրա հեռացումը: Նման կերպ են արտահայտվել նաեւ Հանրապետական կուսակցության որոշ ներկայացուցիչներ:
Բողոքի ակցիաների հետեւանքով զոհվել է մի քանի մարդ, մի շարք պաշտոնյաներ հրաժարական են տվել, նրանց թվում են տրանսպորտի եւ կրթության նախարարները: