Նիկոլ Փաշինյանը նոյեմբերի 9-ի գրավոր եռակողմ հայտարարության եւ ինչ-որ բանավոր պայմանավորվածությունների հիման վրա Ադրբեջանին է հանձնել տարածքները մարդկանց հետ միասին: Այս մասին «Հայելի»-ի հարցազրույցում ասաց ՀՀ առաջին օմբուդսմեն Լարիսա Ալավերդյանը՝ պատասխանելով գերիների նման մեծ թվի պատճառի մասին հարցին:
Նա հիշեցրեց, որ իր ղեկավարած «Ընդդեմ իրավական կամայականության» իրավապաշտպան կազմակերպությունը զբաղվել է գերիների վերադարձի աջակցությամբ 1991-2001 թվականներին, աշխատանքը տարվում էր Հայաստանի եւ Ադրբեջանի պետական մարմինների, երկու երկրների ՀԿ-ների, ինչպես նաեւ Վրաստանի ու Ռուսաստանի հետ համագործակցությամբ:
«Տվյալ դեպքում (պատերազմից հետո գերիների հետ կապված իրավիճակը-խմբ.) կրկին կան ծանր հանցանքի տարրեր: Երբ նոյեմբերի 9-ին հայտարարություն էր ստորագրվում, այդ պահին դեռ ծանր մարտեր էին ընթանում: Տարածքներում, որոնք հայտարարության եւ բանավոր պայմանավորվածության արդյունքում անցել են Ադրբեջանին, մնացել են ջոկատներ եւ քաղաքացիական անձինք: Այդ պայմաններում «մարդասիրության դրսեւորման» մասին խոսելը հանցանք է: Այդ տարածքներն անցել են մարդկանց հետ միասին:Պետական մարմինները պարտավոր են ոչ միայն իմանալ նրանց թիվը, այլ ցուցակ ներկայացնել: Ինչո՞ւ են հանձնել տարածքները՝ չպահանջելով ժամանակ մարդկանց դուրսբերման համար»,-հարց ուղղեց Ալավերդյանը: