Խելացի հայերը, որոնք կարող են զբաղվել բիզնեսով, արդեն վաղուց մեկնել են Հայաստանից Ռուսաստան, Ֆրանսիա, Ամերիկա եւ ուրիշ զարգացած երկրներ: Հայաստանի երրորդ նախագահ Սերժ Սարգսյանը գործունեության համար դաշտ չի թողել: Այդ մասին հունվարի 21-ին լրագրողներին տված հարցազրույցում հայտարարել է ռուս լրագրող, «Իզվեստիա» թերթի խմբագրության տնօրենների խորհրդի նախագահ Արամ Գաբրիելյանովը:
Լրագրողի խոսքով՝ մեղադրելով Փաշինյանին՝ նա չէր փորձում պաշտպանել Սերժ Սարգսյանին: «Երբ Սարգսյանը եղել է իշխանության ղեկին, ես դեռեւս այդ ժամանակ ասել եմ, որ ղեկավարում է մարդ, որը բոլորովին չի հասկանում, որ հզոր ժողովրդի ղեկավարն է: Նա դա բոլորովին չէր հասկանում: Եւ նա նույնպես ունակ չէր ղեկավարել հզոր ժողովրդին: Ինձ հաճախ են հարցնում՝ եթե այդքան հզոր ժողովուրդ է, ապա ինչու է այդպիսի մարդկանց բերում իշխանության ղեկին, եւ ես նրանց պատասխանում եմ, որ գերմանացի ժողովուրդը պակաս հզոր ժողովուրդ չէ, սակայն այնտեղ ղեկավարել է նաեւ Հիտլերը»,-ասել է Գաբրիելյանովը:
