Հարավային Կորեայի իշխանություններն արդեն ոչնչացրել են 21,7 մլն գլուխ տնային թռչուն՝ ամբողջ երկրում ֆերմաներում բարձրախտածնությամբ թռչնագրիպի դեպքերի աճող թվի դեմ պայքարելու համար, փոխանցում է «Ռյոնհափ» գործակալությունը՝ վկայակոչելով պարենի, գյուղատնտեսության, անտառային եւ ձկնային տնտեսության նախարարությանը:
Հարավային Կորեան 2020 թվականին H5N8 բարձրախտածնությամբ թռչնագրիպի առաջին դեպքը հաստատել է նոյեմբերի վերջին Չոլա Պուկտո նահանգի բադի ֆերմայում: Այդ ժամանակ շտամը հայտնաբերվել էր Չոնիպ քաղաքի ֆերմայի բադերի մոտ: Մինչ այդ այս նույն շտամով վարակման դեպքեր գրանցվել էին, բայց վայրի թռչունների շրջանում:
Դրանից հետո վիրուսի բռնկումներ սկսեցին հայտնաբերել նաեւ տարբեր նահանգների ֆերմաներում: Հիվանդության դեպքերի աշխարհագրությունն ընդգրկում է ամբողջ երկիրը՝ սկսած կենտրոնական նահանգ Կյոգիդոյից եւ ավարտած թերակղզու ծայր հարավով: Նախարարության տվյալներով՝ նոյեմբերի վերջից ի վեր երկրում գրանցվել է բարձրախտածնությամբ թռչնագրիպի արդեն 72 դեպք:
Երկրում թռչնագրիպի պատճառով նախազգուշացման մակարդակը բարձրացվել է մինչեւ «լուրջ վտանգ»-ի: Կանոնակարգով վարակված ֆերմաներից 3 կմ շառավղով բոլոր թռչունները ոչնչացվում են:
Բռնկման վայրից 10 կմ շառավղով ֆերմաների համար 30 օրում սովորաբար նաեւ հրաման է թողարկվում թռչնաֆաբրիկաների եւ անասնաբուծական օբյեկտների գործունեությունը, ինչպես նաեւ երկրում դրանց ապրանքների փոխադրումը դադարեցնելու մասին:
