Նախատեսվում է օրենսդրական փոփոխություններ իրականացնել եւ խստացնել տնտեսվարող սուբյեկտներին ջրօգտագործման թույլտվություններ տրամադրելու պայմանները: Այս մասին հունվարի 26-ին լրագրողների հետ հանդիպման ժամանակ ասաց ՀՀ բնապահպանության նախարար Ռոմանոս Պետրոսյանը:
Ձկնաբուծության եւ փոքր հիդրոէլեկտրակայանների շահագործման ոլորտներում, ըստ նրա, շատ լուրջ «ստվերային» եւ օրենսդրական բացեր կան:
«Տնտեսվարող սուբյեկտները գերշահույթ ստանալու համար հաճախ չարաշահում են այդ «հնարավորությունները»»,- նշեց նա:
Պետրոսյանը պարզաբանեց, որ նախարարությունը մտադիր է բարեփոխումներ իրականացնել շրջակա միջավայրի վրա ազդեցության գնահատման ոլորտում (ՇՄԱԳ), որոնք ուղղված կլինեն վերահսկողության ուժեղացմանը պետության կողմից:
«Բացի այդ, շատ կարեւոր է կանխել նոր լքված պոչամբարների (Հայաստանում հայտնաբերվել է այդպիսի 50 պոչամբար), ինչպես նաեւ լքված հանքերի հայտնվելը»,- շեշտեց նախարարը:
