Չնայած նրան, որ 2020 թվականը բավական բարդ էր, այնուամենայնիվ, տնտեսությունում որոշ դրական փոփոխություններ են նկատվում: Մասնավորապես, հաջողվել է կրճատել ապրանքների առեւտրային բալանսի դեֆիցիտը, 2020 թվականի հունարի-նոյեմբերի ամիսներին այն կազմել է 1,8 մլրդ դոլար՝ ընդդեմ անցած տարվա նույն ժամանակահատվածի 2,4 մլրդ դոլարի: Այս մասին Երեւան-Մոսկվա տեսակամրջի ժամանակ ասել է Ռուսաստանի Դաշնության կառավարությանն առընթեր ֆինանսական համալսարանի դոցենտ, տնտեսագետ Արտյոմ Պիլինը:
Նա հավելել է, որ Հայաստանից արտահանումը նվազել է 5 տոկոսով, իսկ Հայաստան ներմուծումը՝ 15 տոկոսով:
«Ընդ որում, Ռուսաստանում հայկական արտահանումը մնացել է ավելի կայուն՝ կրճատվելով 11 տոկոսով, այն դեպքում, երբ ԵԱՏՄ-ում արտահանումը նվազել է գրեթե մեկ երրորդով:
Չնայած ուղիղ արտասահմանյան ներդրումների հոսքի դանդաղեցման՝ միջազգային ֆինանսական կազմակերպությունների կողմից աջակցությունը թույլ է տվել ֆինանսավորել բյուջեի աճող դեֆիցիտը: Բացի այդ, ազգային արժույթը՝ թեեւ նվազել է, սակայն չափավոր, ինչը եւս շատ կարեւոր է ՀՀ տնտեսության համար, որը խիստ կախված է ներմուծումից»,-նշել է Պիլինը:
Նրա գնահատմամբ՝ 2020 թվականի տնտեսական անկումը հանգեցրել է գործազրկության աճի՝ 2019-ին 19 տոկոսից հասնելով 24 տոկոսի 2020-ին:
«Ինչ վերաբերում է 2021 թվականին տնտեսական զարգացման կանխատեսումներին, ապա զինված հակամարտությունն էապես շտկել է դրանք՝ դեպի նվազեցում: Եթե 2020 թվականի աշնանը միջազգային կազմակերպությունները կանխատեսում էին Հայաստանում ՀՆԱ աճ 2021 թվականին 3,5-4 տոկոս մակարդակով, ապա այսօր ԱՄՀ կանխատեսումները 1 տոկոսի մակարդակում են, ինչն էապես ցածր է միջին համաշխարհային (3,2 տոկոս) եւ տարածաշրջանային ցուցանիշներից»,-եզրափակել է Պիլինը: